بھارت کی ریاست کرناٹک کے شہر شموگا میں سرکاری اسکول کے طلبا سے بیت الخلا صاف کروانے کی ویڈیو منظرِ عام پر آگئی۔
میڈیا رپورٹس کے مطابق بھارت میں طلبا سے بیت الخلا صاف کروانے کا یہ تیسرا واقعہ ہے۔ ویڈیو سوشل میڈیا پر وائرل ہونے کے بعد ہیڈ ماسٹر کو معطل کر دیا گیا۔
ویڈیو میں دیکھا جا سکتا ہے کہ چھوٹی جماعت کے طلبا ہاتھوں میں برش اور دیگر سامان لیے صفائی میں مصروف ہیں۔ مذکورہ ویڈیو جب طلبا کے والدین تک پہنچی تو انہوں نے اسکول پہنچ کر احتجاج ریکارڈ کروایا۔
متعلقہ: طلبا سے اسکول کا گٹر صاف کروانا پرنسپل اور اساتذہ کو مہنگا پڑ گیا
جب وزارت تعلیم نے معطل ہیڈ ماسٹر سے اس متعلق دریافت کیا تو انہوں نے بتایا کہ میں نے طلبا کو صرف پانی بہانے کو کہا تھا، انہیں صفائی کا حکم نہیں دیا تھا۔
وزارت تعلیم کے عہدے دار نے بتایا کہ بدھ کے روز واٹس ایپ پر مذکورہ ویڈیو موصول ہوئی تو حکام سے اسکول کا دورہ کرنے اور واقعے کی انکوائری کا حکم دیا۔
یاد رہے کہ اس سے قبل بھی طلبا سے گٹر اور بیت الخلا صاف کروانے کے دو واقعات پیش آ چکے ہیں۔
