بالی ووڈ اداکارہ ودیا بالن نے فلم ’صنم تیری قسم‘ دیکھنے کے بعد پاکستانی اداکارہ ماورا حسین کی اداکاری کی تعریف کی ہے۔
فوٹو اور ویڈیو شیئرنگ ایپ انسٹاگرام پر اداکارہ ودیا بالن نے ’صںم تیری قسم‘ کی تعریف کی اور لکھا کہ اچھی لو اسٹوری ہے اور ماورا حسین کے لیے کہا کہ ’آپ کمال ہو۔‘
ماورا حسین نے بھی تعریف کیے جانے پر ودیا بالن کا شکریہ ادا کیا۔
واضح رہے کہ ماورا حسین اور ہرش وردھن کی فلم ’صنم تیری قسم‘ کو سنیما گھروں میں دوبارہ ریلیز کیا گیا ہے۔
باکس آفس میں اس فلم نے ری ریلیز کے بعد سب سے زیادہ کاروبار کرنےو الی ہندی فلم کا اعزاز حاصل کرلیا ہے، اصل میں یہ فلم 2016 میں ریلیز کی گئی تھی تاہم یہ فلم اس دوران باکس آفس پر بزنس کرنے میں ناکام رہی تھی۔
بھارتی میڈیا کا کہنا ہے کہ فلم کی دوبارہ ریلیز نے غیر معمولی طور پر اچھی کارکردگی کا مظاہرہ کیا ہے، فلم نے صرف بھارت میں پانچ دنوں میں 25.16 کروڑ روپے کو کما کر ہمیش ریشمیا کی فلم ’بی آر‘ اور ’لویاپا‘ کو پیچھے چھوڑ دیا ہے۔
صنم تیری قسم سوشل میڈیا پر بھی ٹرینڈ کر رہی ہے اور اس کی وجہ صرف اس کا دوبارہ ریلیز ہونا اور اچھا بزنس کرنا نہیں ہے بلکہ یہ سب ایک ایسے وقت میں ہو رہا ہے جب ماورا حسین بھی پاکستان میں سوشل میڈیا پر ٹاپ ٹرینڈز میں شامل ہیں اور اس کی وجہ ان کی شادی بھی ہے۔
یہ فلم 2016 میں 5 فروری کو ریلیز ہوئی تھی اور اس بار 2025 میں یہ فلم سات فروری کو عین ماورا حسین کی شادی کے دن ریلیز کی گئی ہے، اور یہ دن فلم اور خود ماورا کے لیے بڑا دن بن گیا ہے۔
