بھارت میں مشہور مٹھائی کی دکان کے سموسے میں مینڈک کی ٹانگ نکل آئی جسے دیکھ کر شہری حیران رہ گیا۔
بھارتی میڈیا رپورٹس کے مطابق ریاست اترپردیش کے شہر غازی آباد کے رہائشی امن کمار نامی شخص نے دعویٰ کیا ہے کہ اس نے مٹھائی کی دکان سے سموسے خریدے تھے جس کے اندر سے مینڈک کی ٹانگ نکلی ہے۔
واقعے کی ویڈیو بھی سوشل میڈیا پر وائرل ہورہی ہے۔
رپورٹ کے مطابق امن کمار نے بتایا کہ اس نے چار سموسے خریدے جب وہ انہیں گھر لے کر گیا تو کھاتے وقت ایک سموسے کے اندر مینڈک کی ٹانگ نظر آئی۔
اس نے واقعے کی ویڈیو ریکارڈ کی اور چند دیگر لوگوں کے ساتھ شکایت کے لیے دکان پر پہنچا اور معاملے کی اطلاع پولیس کو بھی دی۔
پولیس جائے وقوعہ پر پہنچی اور بڑھتے تنازع کو دیکھتے ہوئے دکان کے مالک رام کیش کیخلاف کارروائی کی۔
علاوہ ازیں فوڈ سیفٹی اینڈ ڈرگ ایڈمنسٹریشن ڈپارٹمنٹ نے دکان سے سموسوں کے نمونے اکٹھے کرلیے اور دکان کے مالک کو نوٹس جاری کردیا گیا ہے۔
فوڈ سیفٹی حکام کا کہنا ہے کہ نمونوں کے ٹیسٹ کے نتائج آنے کے بعد مزید کارروائی عمل میں لائی جائے گی۔
