موٹر سائیکل پر لوگ مختلف جانوروں کے ساتھ تو سواری کرتے دیکھے گئے ہیں لیکن پہلی بار کسی خونخوار مگرمچھ کے ساتھ کسی نے یہ ہمت کی ہے۔
آج کل سوشل میڈیا کا دور ہے جس میں آئے روز انوکھی، متجسس اور کرتب پر مبنی ایسی ویڈیوز بھی منظر عام پر آتی رہتی ہیں جن کو انسان اپنی آنکھ سے دیکھ کر بھی یقین کرنے پر آمادہ نہیں ہوتا۔
ایسی ہی ایک ویڈیو پڑوسی ملک بھارت سے سوشل میڈیا پر وائرل کی گئی ہے جو دیکھنے کا خون خشک کر دیتی ہے۔
موٹر سائیکل ایک عام سواری ہے جو آج کل تقریباً ہر دوسرے شخص کے پاس ہوتی ہے۔ آمدورفت کے لیے آسان اس سواری پر آپ نے کبھی کبھار لوگوں کو جانوروں کو ساتھ لے کر جو عموماً پالتو ہوتے ہیں سفر کرتے دیکھا ہوگا۔
تاہم بھارت میں ایک نوجوان موٹر سائیکل پر ایک دیو ہیکل خطرناک مگرمچھ کے ساتھ سیر سپاٹے کرتا پایا گیا ہے۔
سوشل میڈیا پر وائرل اس ویڈیو میں دیکھا جا سکتا ہے کہ ایک نوجوان موٹر سائیکل کی سیٹ پر ایک دیو ہیکل مگرمچ کو باندھ کر اسے بطور سیٹ استعمال کرکے موٹر سائیکل چلاتا نظر آتا ہے۔
اس ویڈیو کو دیکھنے والے کے رونگٹے کھڑے ہو رہے ہیں کہ لیکن وہ نوجوان کمال کی ہمت رکھتا ہے جو اتنے خونخوار جانور کے ساتھ مزے سے سڑک پر گھومتا نظر آتا ہے۔
— Out of Context Human Race (@NoContextHumans) October 3, 2023
سماجی رابطوں کی ویب سائٹ ایکس پر آؤٹ آف کانٹیٹکس نامی اکاؤنٹ سے شیئر کی گئی اس ویڈیو میں بھارتی سڑکوں پر ٹریفک کے دیگر مضحکہ خیز اور خطرناک مناظر کی ویڈیو بھی شامل کی گئی ہے جس سے پتہ چلتا ہے کہ بھارتی موٹر سائیکل جیسی سواری کا کیسا خطرناک اور غلط استعمال کرتے ہیں جس سے دیگر شہریوں کی زندگی کو بھی خطرات لاحق ہوتے ہیں۔
اسی ویڈیو میں آگے چل کر ایک اور نوجوان کو دو بڑے ٹائر جسم پر پہن کر موٹر سائیکل مصروف شاہراہ پر چلاتے بھی دکھایا گیا ہے۔
اس ویڈیو کو لاکھوں صارفین دیکھ چکے ہیں اور دلچسپ تبصروں کا سلسلہ جاری ہے۔ کچھ ایسے کرتب دیکھ کر حیران اور کئی نے غیر ذمے دار رویے پر سوالات اٹھائے ہیں۔
