موسم سرما میں سنگھاڑہ نام کی سوغات بازاروں میں دستیاب ہوتی ہے یہ چیز انسانی صحت کیلیے بے حد مفید ہے خاص طور پر جلد کی خوبصورتی میں اس کا اہم کردار ہے۔
ماہرین صحت کے مطابق سنگھاڑوں کی تاثیر ٹھںڈی ہوتی ہے یہ معدے کی گرمی دور کرنے کے لیے فائدہ مند ثابت ہوتے ہیں، اس میں کاربوہائیڈریٹس، پروٹین، وٹامن بی، پوٹاشیم اور کوپر وافر مقدار میں پایا جاتا ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں معروف ہربلسٹ ڈاکٹر بلقیس نے گفتگو کرتے ہوئے بتایا کہ سنگھاڑا بہت ہی مفید چیز ہے اس میں تمام منرلز موجود ہوتے ہیں۔
ان کا کہنا تھا کہ موسم سرما میں اگر کوئی جلد کی بیماری ہو یا جلد کی خوبصورتی کو برقرار رکھنے کیلئے اس کا پیسٹ بہت کارآمد ہے، اس کے علاوہ پٹھی ہوئی ایڑھیوں اور جلد کی خشکی کے خاتمے کیلئے بے حد مفید ہے۔
ڈاکٹر بلقیس نے بتایا کہ دو عدد کچے سنگھاڑے لیں اس کا چھلکا اتار کر گری نکال لیں، اس کے بعد چمچ ایلوویرا جیل اور چمچ کوکونٹ آئل ملا کر اسے بلینڈ کرلیں، آپ کی کریم تیار ہیں اسے صبح شام لگائیں۔
ان کا کہنا تھا کہ اس پیسٹ کو کولڈ کریم کے طور پر استعمال کریں، اس سے جلد کی خشکی فوری ختم ہوجائے گی۔
اس کے علاوہ سنگھاڑوں کے چھلکوں کے پاﺅڈر سے بنایا جانے والا پیسٹ جلد کے سوجے ہوئے حصوں پر ریلیف کے لیے لگایا جاسکتا ہے، اس کے بیجوں کے پاﺅڈر کو لیموں کے عرق کے ساتھ مکس کرکے جلد پر لگانے کو معمول بنانے سے سوزش جلد کے علاج میں مدد ملتی ہے۔
پھٹی ہوئی جلد اور ایڑھیوں کی ایک اور وجہ ہمارے جسم میں مینگنیز کی کمی ہے، سنگھاڑے کا باقاعدگی سے استعمال مینگنیز کی ضرورت کو پورا کرتا ہے اور اس میں پانی کی زیادہ سے زیادہ مقدار ہمارے جسم کو ہائیڈریٹ رکھتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔