اسلام آباد: وفاقی وزیر بین الصوبائی رابطہ فہمیدہ مرزا نے کہا ہے کہ پہلے قائد اعظم گیمز کا مقصد معذور بچوں کو مکمل سپورٹ دینا ہے، وزیر اعظم ملک کے ہر کونے میں کھیلوں کو فروغ دینا چاہتے ہیں۔
تفصیلات کے مطابق اسلام آباد میں معذور افراد کے لیے پہلے قائد اعظم گیمز پیرا اولمپک کا انعقاد کیا گیا جس میں وفاقی وزیر بین الصوبائی رابطہ فہمیدہ مرزا نے خصوصی شرکت کی۔
وفاقی وزیر نے کھلاڑیوں اور منتظمین کو مبارک باد پیش کی اور کہا کہ کھیلوں کے میدان میں شمولیت کو ہم زیادہ بہتر بنانے کو ترجیح دیتے ہیں، پہلی قائد اعظم گیمز کا مقصد معذور بچوں کو مکمل سپورٹ دینا ہے۔
انھوں نے کہا کہ وزیر اعظم عمران خان ملک کے ہر کونے میں کھیلوں کا فروغ چاہتے ہیں، عمران خان ہر وزیر سے معذور افراد کے لیے اٹھائے گئے اقدامات کی بریفنگ لیتے ہیں۔
یہ بھی پڑھیں: ایئر پورٹس پر بزرگ اورمعذور افراد کو سہولیات فراہم کی جائیں، وزیراعظم کی ہدایت
فہمیدہ مرزا نے اس موقع پر مقبوضہ کشمیر کی صورت حال پر بھی گفتگو کی، انھوں نے کہا کہ کشمیر پر جارحانہ بھارتی قبضے کو 30 روز گزر گئے، ہم کشمیر کی حمایت میں کھڑے ہیں۔
وفاقی وزیر کا کہنا تھا کہ کشمیری جوانوں کو سڑکوں پر گھسیٹا جا رہا ہے، نہتے کشمیریوں پر پیلٹ گنز استعمال کی جا رہی ہیں۔
واضح رہے کہ گزشتہ روز وزیر اعظم عمران خان نے ملک بھر کے ایئرپورٹس پر بزرگ شہریوں اور معذور افراد کے لیے بہترین سہولیات کی فوری فراہمی کا حکم جاری کیا۔
وزیر اعظم سیکریٹریٹ نے احکامات پر تمام ایئرپورٹس مینجرز کو فوری عمل درآمد کی ہدایات جاری کرتے ہوئے کہا کہ بزرگ اور معذور افراد کے لیے پک اینڈ ڈراپ لوکیشنز پر رہنمائی کے سائن بورڈز نصب کیے جائیں، اور وھیل چئیرز کاؤنٹرز کے قیام اور ریمپس کی سہولت فراہم کی جائے۔