بی جے پی کی وزیر پرتیبھا شکلا نے عوام کو ٹماٹر سے دور رہنے کا مشورہ دے ڈالا جس پر کانگریسی رہنماؤں نے انہیں آڑے ہاتھوں لے لیا۔
بھارت میں ان دنوں ٹماٹر سب سے مہنگا ہے اور اتنا مہنگا ہے کہ قیمت سن کر لوگوں کے چہرے ٹماٹر کی طرح لال بھبھوکا ہو جاتے ہیں غصے سے۔ اب اس کا حل بھارتی وزیر نے یہ نکالا ہے کہ عوام کو اس قیمتی ٹماٹر سے ہی دور رہنے کا مشورہ دے ڈالا ہے۔
عوام کو یہ نادر مشورہ دینے والی وزیر بی جے پی سے تعلق رکھنے والی اتر پردیش کی پرتیبھا شکلا ہیں جن کا ایک بیان ان دنوں سوشل میڈیا پر وائرل ہو رہا ہے۔
خاتون وزیر اپنے ویڈیو پیغام میں کہتی ہیں کہ مہنگا ہونے پر اگر لوگ ٹماٹر کھانا چھوڑ دیں گے تو اس کی قیمت خود بخود کم ہو جائے گی۔
انہوں نے عوام کو یہ مشورہ بھی دیا کہ وہ گھروں میں ٹماٹر اگائیں اور جب تک ٹماٹر مہنگے ہیں تب تک اس کی جگہ لیموں کھائیں۔
बाबा के सरकार की मंत्री प्रतिभा शुक्ला कह रही हैं, 'जो चीजें महंगी हैं। उन्हें खाना छोड़ दीजिये।'
यानी सरकार का फ़रमान आ गया कि 'भूखों मरना है तो मरिये! मगर, महंगाई से समझौता नहीं किया जा सकता।' pic.twitter.com/u1pvEh8Vru
— UP Congress (@INCUttarPradesh) July 23, 2023
بی جے پی وزیر کے اس بیان پر کانگریسی رہنما برہم ہوگئے اور انہوں نے شکلا کے اس بیان کو غریب بھارتی عوام کا مذاق اڑانے کے مترادف قرار دیتے ہوئے شدید تنقید کا نشانہ بنایا اور کہا کہ وزیر کو اس قسم کے بیانات دینے کے بجائے مہنگائی کم کرنے پر توجہ دینی چاہیے۔
اس سے قبل 2019 میں بھارتیہ جنتا پارٹی کی ایک اور لیڈر نمریلا سیتا رمن کا پیاز مہنگی ہونے پر اسی طرح کا بیان سامنے آیا تھا، ان سے ملک میں پیاز کی بڑھتی ہوئی قیمتوں سے متعلق سوال کیا گیا تھا تو ان کا کہنا تھا کہ وہ ایسے خاندان سے تعلق رکھتی ہیں جن کا پیاز سے کوئی لینا دینا نہیں ہے۔
تاہم جب ٹماٹر کی قیمتیں بڑھنا شروع ہوئی تو اپوزیشن رہنماؤں کو ان کا پرانا بیان یاد آگیا اور انہوں نے پوچھا کہ کیا مذکورہ وزیر بھی ٹماٹر نہیں کھاتیں؟