لندن: برطانوی ہیلتھ اتھارٹی نے خبردار کیا ہے کہ الرجی کے شکار افراد کورونا ویکسین نہ لگوائیں کیوں کہ گزشتہ روز ویکسین لگوانے والے 2افراد پر الرجک ری ایکشن ہوا ہے۔
برطانوی میڈیا کے مطابق ہیلتھ اتھارٹی نے ان افراد کو ویکسین سے نہ لگوانے کی ہدایت کی ہے جنہیں الرجی کی شکایت ہے بصورت دیگر منفی ری ایکشن ہوسکتا ہے، کیوں کہ گزشتہ روز ویکسین لگوانے والے دو افراد پر الرجک ری ایکشن ہوا تھا۔ متاثرہ افراد کا تعلق طبی شعبے سے ہے۔
اس حوالے سے برطانوی میڈیا نے بتایا کہ ری ایکشن کا شکار دونوں افراد کو الرجی کی شکایت تھی، ویکسین لگوانے والے دونوں افراد طبی شعبے سے منسلک ہیں۔
خیال رہے کہ دنیا بھر میں کورونا وبا کو ویکسین کے ذریعے شکست دینے کی کوششوں کا آغاز ہوچکا ہے، برطانیہ دنیا کا پہلا ملک بن گیا جس نے انجیکشن کی صورت ویکسی نیشن کے عمل کی شروعات کی۔
کرونا کی پہلی ویکسین لگوانے والی خاتون کی عوام سے اہم اپیل
گزشتہ روز کوونٹری میں شمالی آئرلینڈ کی نوے سالہ خاتون مارگریٹ کینن کو کورونا سے بچاؤ کی ویکسین لگائی گئی، معمر خاتون کو یونیورسٹی اسپتال کوونٹری میں یہ ویکیسن دی گئی، اس موقع پر خاتون کا کہنا تھا کہ میرے لئے یہ بڑی اعزاز کی بات ہے کہ میں دنیا میں واحد فرد بنی ہوں جس نے فائزر بائیوٹیک کوویڈ 19 ویکسین استعمال کی۔
برطانیہ کے بعد مرحلہ وار دیگر ممالک میں بھی کورونا ویکسی نیشن کا آغاز ہونے والا ہے۔
