کیلیفورنیا: میٹا کی مقبول میسجنگ ایپ واٹس ایپ نے یوٹیوب طرز کا چینل فیچر متعارف کروا کر صارفین کو خوش کر دیا۔
غیر ملکی میڈیا کی رپورٹس کے مطابق واٹس ایپ نے اعلان کیا ہے کہ اس نے 150 ممالک کے صارفین کیلیے چینل فیچر پیش کر دیا جو آئندہ ہفتوں میں مکمل بحال طور پر ہو جائے گا۔
میٹا کے سی ای او مارک زکربرگ نے اس فیچر کا اعلان اپنے واٹس ایپ چینل کے ذریعے کیا۔
انہوں نے کہا کہ چینل فیچر متعارف کروا کر خوشی محسوس کر رہا ہوں، اب صارفین اپنی پسند کے لوگوں اور اداروں کے چینلز کو فالو کر کے تازہ معلومات حاصل کر سکیں گے، میں اپنا چینل میٹا سے متعلق معلومات شیئر کرنے کیلیے شروع کر رہا ہوں۔
یاد رہے کہ واٹس ایپ نے رواں سال جون میں مذکورہ فیچر کو صرف کولمبیا اور سنگاپور کے صارفین کیلیے پیش کیا تھا جو بعد میں 7 دیگر ممالک میں بھی بحال کیا گیا۔
اس فیچر کی خاص بات یہ ہے کہ صارف کی جانب سے فالو کیے گئے چینلز کا کسی دوسرے کو علم نہیں ہوگا اور اسی طرح چینل چلانے والے کو بھی صارف کے فون نمبر یا دیگر معلومات تک رسائی نہیں ہوگی۔
آئندہ ہفتوں میں صارفین کے پاس ملک کی بنیاد پر چینلز تلاش کرنے کیلیے ایک ڈائرکٹری دستیاب ہوگی۔ جب صارفین کسی چینل سے کسی گروپ یا فرد کو اپڈیٹ شیئر کرتے ہیں تو اس میں چینل کا لنک شامل ہوگا۔
