بھارت میں بیوی نے مبینہ طور پر غیر ازدواجی تعلقات کے شبے میں شوہر پر ابلتا ہوا پانی پھینک دیا۔
بھارتی میڈیا رپورٹس کے مطابق افسوسناک واقعہ ریاست اترپردیش کے علاقے دیوریا میں پیش آیا، پولیس نے خاتون امرتا کو گرفتار کرکے واقعے کا مقدمہ درج کرلیا۔
متاثرہ شخص کی شناخت اشیش رائے کے نام سے ہوئی، اشیش کو ابتدائی طبی امداد کے لیے قریبی اسپتال منتقل کیا گیا پھر اسے مہارشی دیورہ بابا میڈیکل کالج ریفر کردیا گیا۔
متاثرہ شخص نے بتایا کہ واقعہ 13 اپریل کو اس وقت پیش آیا جب وہ بیوی کے ساتھ سسرال اس کے بیمار بھائی کی عیادت کے لیے گیا تھا، سسرال پہنچنے پر امرتا نے رات سسرال میں رکنے کی درخواست کی۔
اشیش نے الزام لگایا کہ جب میں سو رہا تھا تو رات کو امرتا اٹھی اور باورچی خانے سے ابلتا ہوا پانی لے کر آئی اور مجھ پر پھینک دیا۔
متاثرہ شخص کا کہنا تھا کہ جب اس نے بھاگنے کی کوشش کی تو سسر اور بیوی نے مارا پیٹا اور بہنوئی نے چھت سے نیچے پھینک دیا۔
اے ایس پی بھیم کمار کا بتانا ہے کہ واقعے کا مقدمہ چار افراد کیخلاف درج کیا گیا ہے جبکہ ملزمہ امریتا کو گرفتار کرلیا گیا ہے۔
