ممبئی: سال 2018 بالی وڈ کے لیے حیرتوں سال رہا، ایک جانب جہاں میگا اسٹارز کی فلموں کو ناکامیوں کا سامنا رہا، وہیں ابھرتے ہوئے اداکاروں کی فلموں نے حیران کن بزنس کیا۔
تفصیلات کے مطابق سنجے لیلا بھنسالی کی متنازع فلم پدماوت (بزنس، 300 کروڑ) سے شروع ہونے والے سال 2018 روہت شیٹھی کی فلم سمبا پر ختم ہوا۔ اتفاق یہ ہے کہ دونوں ہی فلموں میں رنویر سنگھ نے مرکزی کردار ادا کیا اور دونوں فلموں نے باکس آف پر راج کیا۔ آئیں، اس برس کے چند دل چسپ پہلوئوں پر بات کرتے ہیں۔
کیا خانز کا زوال شروع ہوگیا؟
اس سال تینوں خانز کی فلمیں ریلیز ہوئیں اور بڑے تہواروں، یعنی عید، دیوالی اور کرسمس پر ریلیز ہوئیں، البتہ یہ تہوار ان فلموں کے کام نہیں آئے، تینوں ہی فلمیں باکس آفس پر فلاپ ثابت ہوئیں۔
عید پر ریلیز ہونے والا بڑی اسٹار کاسٹ کی فلم ’’ریس تھری‘‘ اس تہوار پر سلمان خان کی لگاتار دوسری فلاپ فلم تھی، گذشتہ برس ٹیوب لائٹ کو ناکامی کا سامنا کرنا پڑا تھا۔
دیوالی پر میگا بجٹ فلم ’’ٹھگز آف ہندوستان‘‘ آئی، جو مہنگی ترین فلم تھی، پہلے دن فلم نے ریکارڈ بزنس کیا، مگر دوسرے ہی دن باکس آفس پر ڈھے گئی۔
کرسمس پر شاہ رخ خان کی ’’زیرو‘‘ سے بڑی امیدیں تھیں، مگر ان کی ناکامیوں کا سفر ختم نہیں ہوا، فلم کو بدترین ناکامی کا سامنا کرنا پڑا اور یہ بحث شروع ہوگئی کہ خانز کا دور ختم ہوگیا۔
رنبیر کا کم بیک اور رنویر کی کامیابیاں
کیریر کے آغاز ہی میں رنبیر کپور اور رنویر سنگھ کو اسٹار ز ٹھہرا دیا گیا تھا، بعد کے برسوں میں دونوں اداکاروں کو کامیابیاں ملیں۔
گذشتہ دو برس سے رنبیر کپور کے ستارے گردش میں تھے، فلمیں پے در پے فلمیں ناکام ہوئیں۔ دوسری جانب سنجے لیلا بھنسالی اور دیپکا پاڈکون کا ساتھ رنویر سنگھ کے لیے خوش بختی لایا اور وہ کامیابیوں کی سیڑھیاں چڑھتے رہے۔
اس برس بھی رنویر کی کامیابیوں کا سلسلہ جاری رہا، جب کہ رنبیر کپور بھی راج کمار ہیرانی کی بلاک بسٹر فلم ’’سنجو‘‘ کے ساتھ کم بیک کرنے میں کامیاب رہے، جس نے اس سال 341 کروڑ کا بزنس کیا، جو ’’دنگل‘‘ کے بعد ایک ریکارڈ ہے۔
اکشے کمار اور اجے دیوگن کے اچھے دن
اکشے کمار اور اجے دیوگن اپنی مقبولیت کے باوجود کبھی خانز کے قریب نہیں پہنچ سکے، مگر گذشتہ چند برس کے دوران انھوں نے ایسی فلمیں منتخب کیں، جنھیں ناقدین کی جانب سے بھی سراہا گیا اور انھوں نے اچھا بزنس کیا۔
اس برس اکشے کمار سپراسٹار رجنی کانب کے ساتھ فلم 2.0 میں جلوہ گر ہوئے، جس نے ہندی بیلٹ میں 188 کروڑ کا حیران کن بزنس کیا۔ ’’گولڈ‘‘ نے بھی 107 کروڑ کمائے، پیڈ مین نے بھی مناسب بزنس کیا۔
دوسری جانب ’’سنگھم‘‘ اور ’’گول مال‘‘ سیریز کی وجہ سے مقبول اجے کی فلم ’’ریڈ‘‘ بھی سو کروڑ کلب کا حصہ بنی۔
نئے سپراسٹار
بالی وڈ میں چند نوجوان اداکاروں کو قابلیت کے باوجود فقط سنجیدہ اور کم بجٹ کی فلموں کا اسٹار سمجھا جاتا تھا۔ اس ضمن میں دو نام نمایاں تھے، ایک راج کمار راؤ اور آیوشمان کھرانا نمایاں تھے۔
البتہ اس سال چھوٹی فلموں کے ان ستاروں نے باکس آف پر سب کو حیران کر دیا۔ راج کمار راؤ کی فلم استری نے 129 کا حیران کن بزنس کیا، جب کہ آیوشمان کی فلم اندھا دھند 72 کروڑ اور بدھائی ہو نے باکس آفس پر 136 کروڑ سمیٹے۔
اس کے علاوہ ٹائیگر شروف کی فلم باغی ٹو نے بھی شان دار بزنس کیا. اس کا تیسرا پارٹ 2019 میںریلیز ہوگا.
