بالی ووڈ کی معروف اداکارہ زرین خان کا کہنا ہے کہ میں سلمان خان سے مداح کی طرح ملی تھی انہوں نے انڈسٹری میں متعارف کرواکے میری زندگی بدل دی۔
بھارتی میڈیا کو دیے گئے حالیہ انٹرویو میں اداکارہ زرین خان نے کہا کہ سلمان خان سے میں ایک مداح کی طرح ملی تھی اور مجھے نہیں معلوم تھا کہ وہ میری زندگی اس طریقے سے بدل دیں گے، اگر وہ نہیں ہوتے میں انڈسٹری کا حصہ نہیں بن سکتی تھی کیونکہ میں نے سوچا نہیں تھا کہ میں بالی ووڈ میں آؤں گی۔
انہوں نے کہا کہ سلمان خان وہ اداکار ہیں جنہیں میرا پورا خاندان پسند کرتا ہے اور ہمیشہ سے پسند کرتا آیا ہے۔
زرین خان نے کہا کہ سلمان خان کے ساتھ ’ویر‘ میں اداکاری کرنا کسی خواب سے کم نہیں تھا، فلم کی شوٹنگ ایک سے ڈیڑھ سال تک چلی اور مجھے یقین نہیں تھا کہ میں ان کے ساتھ فلم میں اداکاری کررہی ہوں۔
یہ پڑھیں: زرین خان نے پاکستان آنے کی خواہش ظاہر کر دی
زرین خان نے مزید بتایا کہ ان کا وزن ایک قومی مسئلہ بن گیا تھا، کیونکہ اس وقت میں ایک فلم کررہی تھی جو اٹھارویں صدی کی شہزادیوں اور عورتوں سے متعلق تھی، انہیں نہیں پتا تھا کہ سکس پیک کیا ہوتے ہیں اور فٹ جسم کیا ہوتا ہے، یہ تو ہم ابھی دیکھ رہے ہیں۔
اداکارہ نے بتایا کہ اس وقت وہ تھوڑا کنفیوز تھیں کیونکہ میں ٹین ایج میں تھی اور میرا وزن بھی 100 کلو تھا، جس کے بعد میں نے اپنا 50 کلو وزن کم کرلیا تھا۔
خیال رہے کہ اداکارہ زرین خان آخری مرتبہ 2021 میں فلم ہم بھی اکیلے تم بھی اکیلے میں نظر آئی تھیں۔
