اسلام آباد: عمران خان کا کہنا ہے قوم فیصلہ کرچکی ہے کہ اب قبضہ گروپ کا مزید ظلم برداشت نہیں کرے گی۔
آزادی مارچ کے شرکاءسے خطاب میں چیئرمین تحریک انصاف عمران خان نے کہا کہ عام انتخابات میں بد ترین دھاندلی ہو ئی ہے، حکمرانوں کو پتہ ہے اگر ہم کامیاب ہوگئے تو ان کی دکانداری بند ہو جائے گی، ان کا کہنا تھا ظلم کے خلاف ڈٹ کر مقابلہ کرنا ہوگا،18 سال کی سیاست میں قوم میں پہلی بار ولولہ دیکھ رہا ہوں،نئے پاکستان کی بنیاد عدل اور انصاف پر رکھیں گے ۔ عمران خان کا کہنا تھا 45 سال پہلے پی آئی اے دنیا کی دوسری بہترین ایئرلائن تھی، سستی روٹی سکیم بدنام ایفی ڈرین عباسی کے حوالے کردی گئی ۔
عمران خان کا کہنا تھا این اے 73بھکرمیں مسلم لیگ ن دھاندلی کے ذریعے جیتی، مولانا کو چیلینج کرتا ہوں ، ذرا سی بھی شک ہے تو پی کے 68 میں دوبارہ گنتی کروالو، ان کا کہنا تھا ایازصادق کو اپنی کامیابی کا یقین ہے تو کیوں سٹے آرڈر لے رکھا ہے ۔
ان کا کہنا تھا کہ تحریک آزادی کے بعد یہ تحریک سب سے بڑی ہے، ہم اپنے لئے نہیں بلکہ مظلوم طبقے کے لئے جدوجہد کر رہے ہیں، ان لوگوں کے لئے قربانیاں دے رہے ہیں جنہیں حکمران بھیڑ بکریوں کی طرح رکھتے ہیں اوران بچوں کے لئے لڑ رہے ہیں جنہیں ان کے بنیادی حق تعلیم کے حصول سے دور رکھا جاتا ہے۔
انہوں نے خیبر پختونخوا کے حوالے سے بتایا کہ خیبر پختونخوا حکومت تمام صو بوں سے بہتر ہے، خیبر پختونخوا میں کرپشن پر قابو پایا گیا، 302 کرپٹ افسران کو پکڑا، کے پی کے میں ایف آئی آر آن لائن درج ہوتی ہے، صو بے میں پو لیس بھرتیاں سیاسی بیناد پر نہیں ہوتیں، 15ہزار ٹیچرز کو میرٹ پر ملازمتیں فراہم کیں صو بے میں کسی کا کوٹہ نہیں ہو تا، 70فیصد اسکول لڑکیوں کیلئے قائم کئے جا ئیں گے۔
عمران خان نے کہا کہ عوام جب تک ظلم کیخلاف کھڑے نہیں ہونگے، یہ نظام ایسے ہی چلتا رہے گا، اللہ نے تقدیر بدلنے کا موقع دیا ہے، پاکستانیوں! وقت ضائع نہ کرو۔ وزیراعظم کے استعفے کیلئے تمام پاکستانیوں کو سڑکوں پر نکلنا ہوگا۔
