اسلام آباد : چین کے بڑے کاروباری شہر تیانجن کے سرمایہ کاروں کے ایک وفد نے جین لنگ ژو کی قیادت میں اسلام آباد چیمبر آف کامرس کا دورہ کیا اور پاکستان میں سرمایہ کاری و مشترکہ منصوبے شروع کرنے میں گہری دلچسپی کا اظہار کیا۔
وفد میں تعمیرات، پی پی آر پائپ اور فٹنگ، انٹیرئر ڈیزائنگ، الیکٹرک کا سامان، موبائل اینڈ موبائل اسسریز، سیکورٹی مصنوعات سمیت دیگر شعبوں کے سرمایہ کار شامل تھے۔
اس موقع پر خطاب کرتے ہوئے چین کے تجارتی وفد کی سربراہ جین لنگ ژونے کہا کہ پاکستان کی تاجر برادری چین کے ہم منصبوں کے ساتھ مضبوط روابط قائم کرنے کی کوشش کریں ، جس سے ان کے کاروبار کو بہتر وسعت ملے گی۔
چین کے وفد کو خوش آمدید کہتے ہوئے اسلام آباد چیمبر آف کامرس اینڈ انڈسٹری کے قائم مقام صدر محمد شکیل منیر نے کہا کہ چین پاکستان کی اقتصادی ترقی میں نمایاں کردار ادا کر رہا ہے۔
انہوں نے کہا کہ توانائی، انفراسٹرکچر ڈیولپمنٹ اور زراعت سمیت پاکستان کی معیشت کے مختلف شعبوں میں سرمایہ کاری کے عمدہ مواقع پائے جاتے ہیں ، چین کے سرمایہ کار پاکستان میں صنعتی یونٹس لگانے کے ساتھ ساتھ دیگر شعبوں میں سرمایہ کاری کرنے کی کوشش کریں۔
