اسلام آباد : الیکشن کمیشن نے انتخابی دھاندلی سے متعلق جوڈیشل کمیشن میں پیش کرنے کے لئے جواب تیار کرلیا۔
ذرائع کے مطابق الیکشن کمیشن نے ابتدائی طور پر گیارہ صفحات پر مشتمل جواب تیار کیا ہے۔ کمیشن کی طرف سے مسودے کی منظوری کے بعد جوڈیشل کمیشن میں یہ جواب داخل کیا جائے گا۔
جواب میں الیکشن کمیشن نے عام انتخابات دوہزار تیرہ میں دھاندلی سے متعلق تمام الزامات مسترد کردئیے ہیں اور کہا ہے کہ عالمی مبصرین نے عام انتخابات کو شفاف قرار دیا۔الیکشن کمیشن نے عالمی مبصرین کی رپورٹس بھی جواب کا حصہ بنائی ہے۔
الیکشن کمیشن نے کہا ہے کہ عام انتخابات کیلئے بیلٹ پیپر زمارکیٹ سے نہیں چھپوائے گئے اور یہ یہ بیلٹ پیپرز خصوصی فیچرز کے حامل تھے ۔
بیلٹ پیپرز کی چھپائی اور ترسیل فوج کی نگرانی میں کی گئی۔الیکشن کمیشن کے مطابق مقناطیسی سیاہی پی سی ایس آئی آر سے تیار کرائی گئی اور نادہ نے اس سیاہی کی باقاعدہ منظوری دی۔
اس حوالے سے جو الزامات عائد کیے گئے ہیں بے بنیاد ہیں۔ڈی جی الیکشن کی سربراہی میں الیکشن کمیشن حکام آج دن بھر بند کمرے میں مشاورت کرتے رہے اور جوڈیشل کمیشن میں پیش کرنے کے لئے مواد اکٹھا کرتے رہے۔
الیکشن کمیشن کے ذرائع کے مطابق کمیشن کی منظوری کے بعد یہ جواب جوڈیشل کمیشن میں پیش کردیا جائے گا۔ڈی جی الیکشن شیر افگن پر پی ٹی آئی نے عام انتخابات میں دھاندلی میں ملوث ہونے کے الزامات عائد کئے تھے۔
