اسلام آباد: مبینہ انتخابی دھاندلی کیخلاف جوڈیشل کمیشن کی سماعت آج ہوگی، عمران خان کا کمیشن کے سامنے پیش ہونے کا امکان ہے۔
دوہزار تیرہ کی مبینہ انتخابی دھاندلی کی تحقیقات کیلئے جسٹس ناصرالملک کی سربراہی میں جوڈیشل کمیشن کا اجلاس آج ہورہا ہے، ایم کیوایم نے بھی کمیشن کے سامنے پیش ہونے کا فیصلہ کیا ہے۔
اس ضمن ڈاکٹر فاروق ستار نے جوڈیشل کمیشن کے سربراہ کو خط لکھ دیا ، جس میں کہا گیا کہ جوڈیشل کمیشن پر تحفظات ہیں لیکن دھاندلی سے متعلق مؤقف پیش کرنا چاہتے ہیں۔
جماعت اسلامی اور پیپلزپارٹی نے بھی فریق بننے کی درخواست جمع کرائی، جماعت اسلامی کے رہنماء حافظ نعیم الرحمان کا کہنا ہے مئی دو ہزار تیرہ کا الیکشن ٹھپہ الیکشن تھا۔
پیپلز پارٹی کے لطیف کھوسہ نے کہا کہ سارے شواہد اور تحفظات پیش کر دیئے ہیں، جے یو آئی ،مسلم لیگ ق اور اے این پی بھی فریق بننے کی درخواست دے چکی ہیں ۔
