اسلام آباد : تحریک انصاف کے رہنما شفقت محمود کا کہنا ہے کہ حکومت آج کے جلسے سے خائف ہوکر اوچھے ہتھکنڈے استعمال کررہی ہے۔ جلسے میں شرکت کے لیے پی ٹی آئی کے کارکنان قافلوں کی صورت میں اسلام آباد روانہ ہورہے ہیں۔
پی ٹی آئی کا قافلہ اپوزیشن لیڈر پنجاب محمود الرشید اور شفقت محمود کی قیادت میں ٹھوکر نیاز بیگ انٹر چینج سے اسلام آباد کے لیے روانہ ہوا اس موقع پر میڈیا سے گفتگو کرتے ہوئے شفقت محمود نے کہا کہ حکومت آج کے جلسے سے خائف ہے پی ٹی آئی کے کارکنوں کی گاڑیاں بند کی جارہی ہیں ۔
جبکہ ہزاروں کی تعداد میں کارکنوں کو گرفتار کیا گیا تاکہ کوئی اسلام آباد نہ پہنچے انھوں نے کہا کہ الیکشن دھاندلی کی بنیاد پر کروائے گئے جب تک انھیں کالعدم قرار نہیں دیا جاتا احتجاج جاری رہے گا۔
اپوزیشن لیڈر پنجاب محمود الرشید نے اس موقع پر کہا کہ دھرنے میں شامل ہونے یا نہ ہونے کا فیصلہ طاہر القادری کا ہے وہ اپنی مرضی سے دھرنے میں بیٹھے اور مرضی سے اٹھے انھیں مجبور نہیں کیا جاسکتا۔
