خیبرایجنسی: آپریشن خیبر ٹو کامیابی سے جاری ہے، سیکیورٹی فورسز کی فضائی کارروائی میں بارہ دہشت گرد مارے گئے۔
سیکیورٹی ذرائع کےمطابق خیبرایجنسی کی وادی تیراہ میں دہشت گردوں کے ٹھکانوں پر جیٹ طیاروں کی بمباری سے بارہ دہشت گرد ہلاک اور سات زخمی ہوئے جبکہ ان کے کئی ٹھکانے بھی تباہ کردیئے گئے۔
پاک فوج نے خیبر ایجنسی میں آپریشن خیبر ٹو میں تیزی لاتے ہوئے بڑی کامیابی حاصل کی ہے۔
گذشتہ اڑتالیس گھنٹوں میں کارروائی کےدوران انتالیس دہشتگرد مارے گئے جبکہ پاک فوج کےایک کیپٹن سمیت پانچ جوانوں نے بھی جام شہادت نوش کیا تھا۔
واضح رہے کہ پاک فوج نے جون 2014 میں ملک کے قبائلی علاقے شمالی وزیرستان میں آپریشن ضرب عضب شروع کیا تھا جبکہ اکتوبر 2014 میں خیبر ایجنسی میں آپریشن خیبر ون اور مارچ 2015 میں آپریشن خیبر ٹو شروع کیا گیا۔
یاد رہے کہ دسمبر2014 کو پشاور میں آرمی پبلک اسکول میں دہشت گردوں کے حملے میں 133 سے زائد بچوں سمیت 150 افراد کی ہلاکت کے بعد شدت پسندوں کے خلاف آپریشن تیز کر دیا گیا ہے۔
