امریکہ :سوشل میڈیا ہماری زندگی میں پوری طرح در آئی ہیں۔ اسکا استعمال جہاں آپ کے نئے تعلقات اور رشتوں سے جوڑتا ہے وہیں آپ کے حقیقی سماجی تعلقات میں بگاڑ لانے کا سبب بھی بن جاتا ہے۔
صرف یہی نہیں یہ سائٹس آپ کی ملازمت پر بھی اثرانداز ہوسکتی ہیں، دنیا میں جہاں ملازمت کا حصول مشکل ہوچکا ہو اور لگی لگائی ملازمت سے محروم ہوجانا عام سی بات ہو، وہاں نوکری اور ہر ماہ باقاعدگی سے ملنے والی تن خواہ کی اہمیت سے کون انکار کرسکتا ہے۔
ملازمت حاصل کرنے ہی کے لیے صرف پاپڑ نہیں بیلنا پڑتے بل کہ اسے برقرار رکھنے اور اپنے ادارے کو اپنی کارکردگی سے خوش اور مطمئن کرنے اور ترقی پانے کے لیے بھی جان توڑ محنت کرنا پڑتی ہے، ایسے میں سوشل میڈیا سائٹس پر آنے والے غیرذمے دارانہ الفاظ، تصاویر یا دیگر پوسٹ آپ کو ملازمت سے محروم کرنے کا سبب بن جائیں تو یہ یقیناً یہ آپ کے لیے نہایت افسوس ناک امر ہوگا۔ عین ممکن ہے کہ آپ کی طرف سے ہونے والا فیس بک پر کوئی پوسٹ، کوئی کمنٹ یا ٹوئٹر اس سانحے کا سبب بنا ہو۔
دنیا میں یہ رجحان زور پکڑتا جارہا ہے کہ ملازمت کے لیے درخواست دینے والے افراد کے سوشل میڈیا پر بنے ہوئے اکاؤنٹس کا جائزہ لیا جاتا ہے۔
امریکا میں ہونے والے ایک سروے کے مطابق آج کے دور میں کسی شخص کو ملازمت پر رکھنے سے پہلے 93 فی صد منیجرز اس کے سوشل میڈیا پر موجود دیکھ کر فیصلہ کرتے ہیں۔
اس سروے میں بتایا گیا ہے کہ 55 فی صد منیجرز ملازمت کے کسی امیدوار کے سوشل میڈیا پروفائلز میں موجود تفصیلات اور دیگر چیزوں کو دیکھ کر کوئی فیصلہ کرتے ہیں اور ان میں سے 61 فی صد منفی تاثر ہی لیتے ہیں، سروے میں مزید بتایا گیا ہے کہ سوشل میڈیا پر کی جانے والی پوسٹس اور کمنٹس وغیرہ کی وجہ سے ملازمت کو سب سے زیادہ خطرہ اس وقت ہوتا ہے جب کسی بھی طرح غیرقانونی منشیات کے بارے میں کوئی حوالہ دیا گیا ہو۔
اس سروے کا حصہ بننے والے 66 فی صد منیجرز کا کہنا تھا کہ کہ کسی کی تضحیک کرنا یا مذہب کے خلاف کی جانے والی پوسٹس امیدوار کی پوزیشن کم زور کردیتی ہیں۔ پچاس فی صد سے زائد منیجرز نے اسلحے کی نمائش اور اس کے حق میں کی جانے والی پوسٹس کو ناپسندیدہ عمل قرار دیا۔ اسی طرح 44 فی صد نے الکحل کے استعمال پر مبنی پوسٹس کو ملازمت نہ ملنے یا نوکری سے برطرفی کا سبب قرار دیا۔
سوشل میڈیا استعمال کرتے ہوئے ان سب ناپسندیدہ عناصر سے دوری ہی ضروری نہیں، بل کہ کچھ اور چیزیں بھی ملازمت کے حصول کی راہ میں رکاوٹ یا روزگار سے محروم کیے جانے کا سبب بن سکتی ہیں۔
اس سروے میں یہ بھی بتایا گیا ہے کہ ملازمت دینے کی اتھارٹی رکھنے والوں کی اس حوالے سے سب سے پسندیدہ سائٹ لنکڈان ہے، ہمیں بھی اس بات کا خیال رکھنا چاہیے کہ سوشل ویب سائٹس پر ہماری سرگرمیاں ہماری ملازمت پر بھی اثرانداز ہوسکتی ہیں۔
