کراچی : کے ڈی اے نے سپریم کورٹ کے احکامات پر عمل درآمد کرتے ہوئے تجاوزات کیخلاف آپریشن کرتے ہوئے چار شادی ہال مسمار کردیئے، مذکورہ شادی ہال رفاعی پلاٹس پر غیر قانونی طور پر قائم کیے گئے تھے۔
تفصیلات کے مطابق عدالت عظمیٰ کے احکامات پرعمل درآمد کرتے ہوئے کے ڈی اے کی جانب سے گلستان جوہر، یونیورسٹی روڈ اور نارتھ کراچی میں رفاعی پلاٹس خالی کرانے کے لئے تجاوزات کیخلاف آپریشن دوسرے روز بھی جاری ہے۔
کے ڈی اے کی ٹیم نے گلستان جوہر، یونیورسٹی روڈ اور نارتھ کراچی میں رفاعی پلاٹس پر قائم شادی ہالوں کو مسمار کردیا۔
آپریشن کے دوران ہیوی مشینری کا بھی استعمال کیا جا رہا ہے، ٹیم نے یونیورسٹی روڈ پر ایک شادی ہال اور نارتھ کراچی میں تین شادی ہالز مسمار کئے۔
مزید پڑھیں: کراچی میں شادی ہالز کے خلاف آپریشن، دو لان مسمار
واضح رہے کہ اب تک کے ڈی اے کا انسداد تجاوزات سیل 12 شادی ہال اور مکان مسمار کرچکا ہے، سپریم کورٹ نے دو روز میں شہر کے تمام رفاعی پلاٹس خالی کرانے حکم دیا تھا، اس سے قبل سرجانی ٹاؤن اور اطراف کے علاقوں میں تجاوزات کیخلاف آپریشن کر کے متعدد شادی ہالوں اور مکانات کو منہدم کردیا گیا تھا۔
