لاہور: سپریم کورٹ کے الیکشن سے متعلق فیصلے کے بعد پی ٹی آئی نے کل یوم تشکر منانے کا اعلان کردیا۔
اے آر وائی نیوز کے مطابق سپریم کورٹ کے فیصلے کے بعد پی ٹی آئی نے کل رات 9 بجے لبرٹی چوک پر یوم تشکر منانے کا اعلان کیا ہے۔
پی ٹی آئی رہنما حماد اظہر کا کہنا ہے کہ کل عمران خان کا خطاب ملک بھر میں براہ راست دکھایا جائے گا۔
اس سے قبل چیئرمین پی ٹی آئی عمران خان نے نیوز کانفرنس کرتے ہوئے کہا کہ حقیقی آزادی کا راستہ انصاف سے ہی آتا ہے آج قوم خوشیاں منائے کیونکہ حقیقی آزادی کی طرف بڑھ رہے ہیں۔
عمران خان نے کہا کہ وہ قومیں دیکھ لیں جہاں قانون کی بالادستی ہے وہاں خوشحالی ہے، ڈنمارک دنیا میں نمبر ون ہے جہاں قانون کی بہترین حکمرانی ہے جبکہ پاکستان قانون کی حکمرانی میں 140 ممالک میں 129ویں نمبر پر ہے۔
انہوں نے کہا کہ خوشحالی قانون اور انصاف کے ساتھ آتی ہے آج سپریم کورٹ کا بڑا فیصلہ آیا ہے جو قانون کی حکمرانی ثابت کرتا ہے۔
یہ پڑھیں: سپریم کورٹ نے پنجاب اور خیبرپختونخوا الیکشن التواء کیس کا فیصلہ سنادیا
عمران خان نے کہا کہ آئین کہتا ہے کہ اسمبلی تحلیل کریں تو90 دن کے اندر الیکشن کرانا ہوں گے۔
واضح رہے کہ سپریم کورٹ نے الیکشن کمیشن کا 22 مارچ کا فیصلہ کالعدم قرار دیتے ہوئے معمولی تبدیلی کے ساتھ انتخابی شیڈول بحال کر دیا ہے۔
چیف جسٹس عمر عطا بندیال نے فیصلہ سناتے ہوئے کہا کہ پنجاب میں 14 مئی کو انتخابات ہوں گے، کاغذات نامزدگی 10 اپریل تک جمع کرائے جائیں، حتمی فہرست 19 اپریل تک جاری کی جائے گی اور انتخابی نشانات 20 اپریل کو جاری کیے جائیں گے۔
