اترپردیش: بھارت میں ایک پندرہ سالہ لڑکی کی آنکھوں سے آنسوؤں کی جگہ پتھر نکلتے ہیں، ویڈیو دیکھ کر لوگ حیران رہ گئے۔
تفصیلات کے مطابق ریاست اترپردیش کے ایک گاؤں گادیا بلداسپور کی رہائشی 15 سالہ چاندنی کی آنکھوں سے آنسو کی بجائے پتھر بہنے لگے ہیں۔
والدین کا کہنا ہے کہ 17 جولائی سے اچانک چاندنی کی آنکھوں سے آنسوؤں کی جگہ پتھر نکلنے لگے ہیں، اور اس کی آنکھوں سے روز دس سے پندرہ پتھر نکلتے ہیں، جب کہ اب تک وہ تقریباً 70 پتھر جمع کر چکے ہیں۔
اس لڑکی کی آنکھوں سے پتھر نکلنے کی ایک ویڈیو بھی منظر عام پر آ گئی ہے، جسے دیکھ کر لوگ حیران رہ گئے، تاہم ڈاکٹرز اس کرشمے کو تسلیم کرنے سے انکاری ہیں۔
ڈاکٹرز کا کہنا ہے کہ یا تو یہ لڑکی خود آنکھوں میں پتھر ڈال کر نکالتی ہے، یا کوئی دوسرا پتھر اس کی آنکھ میں ڈالتا ہے۔ ماہر امراض چشم کا کہنا ہے کہ اس سلسلے میں کوئی سائنسی تحقیق موجود نہیں ہے۔
ان کا کہنا ہے کہ یہ لڑکی اپنی آنکھوں میں پتھر ڈالتی ہے تاکہ انھیں آنسوؤں کی طرح باہر نکال کر لوگوں کی توجہ حاصل کر سکے۔
ڈاکٹر نیرج گپتا کا کہنا ہے کہ اس طرح کی چیز میڈیکل میں موجود ہی نہیں ہے یہ ممکنہ طور پر فریبی عمل ہے۔
