نئی دہلی: دنیا بھر میں کرپٹو کرنسی کی مارکیٹ میں تیزی آرہی ہے تاہم بھارت میں اس پر پابندی کا بل متعارف کروانے پر غور کیا جارہا ہے۔
بھارتی حکومت نے حیران کن قدم اٹھاتے ہوئے پرائیویٹ کرپٹو کرنسیوں پر پابندی کے لیے ایک بل متعارف اور مرکزی بینک کی حمایت یافتہ ڈیجیٹل کرنسی کے لیے ایک فریم ورک بنانے کا منصوبہ بنایا ہے۔
بھارتی میڈیا کے مطابق لوک سبھا میں پیش کیے گئے بل میں کہا گیا کہ مجوزہ بل کا مقصد ہندوستان میں تمام نجی کرپٹو کرنسیوں پر پابندی لگانا ہے۔
یہ اقدام ایک ایسے موقع پر اٹھایا گیا کہ جب گزشتہ ہفتے وزیر اعظم نریندر مودی نے خبردار کیا تھا کہ بٹ کوائن نوجوان نسلوں کے لیے خطرہ ہے اور اگر یہ غلط ہاتھوں میں لگ گئی تو ہماری نوجوانوں کو خراب کر سکتی ہے۔
واضح رہے کہ ستمبر میں چین کی جانب سے کرپٹو کرنسی کے تمام لین دین کو غیر قانونی قرار دیے جانے کے بعد یہ ایک بڑی ابھرتی ہوئی معیشت کی طرف سے تازہ ترین اقدام ہے۔
گزشتہ سال اپریل میں بھارتی سپریم کورٹ نے کرپٹو کرنسی پر لگائی گئی سابقہ پابندی کو کالعدم قرار دے دیا گیا تھا جس کے بعد بھارت میں کرپٹو کرنسی کی مارکیٹ میں تیزی آئی تھی اور اس کی قیمت میں 600 فیصد سے زیادہ اضافہ ہوا تھا۔
ایشیا کی تیسری سب سے بڑی معیشت میں ڈیڑھ کروڑ سے 10 کروڑ افراد کے پاس کرپٹو کرنسی ہے جس کی کل مالیت کا تخمینہ اربوں ڈالر لگایا گیا ہے تاہم اس بل کے بعد اس کرنسی میں سرمایہ کاری کا مستقبل غیر یقینی نظر آتا ہے۔
بھارت میں نئے قانون ساز اجلاس میں پیش کیے جانے والا بل کرپٹو کرنسی ٹیکنالوجی کو فروغ دینے کے لیے کچھ استثنیٰ کی اجازت بھی دے گا البتہ اس کے علاوہ مجوزہ قانون سازی کے بارے میں مزید تفصیلات جاری نہیں کی گئیں۔
تاہم اس اعلان کے باوجود بٹ کوائن کی مارکیٹ کی قیمت غیر متاثر نظر آتی ہے اور منگل کو بھارت میں کرنسی کی قیمت مزید 1.6فیصد بڑھ گئی لیکن مقامی تاجروں اور خریدار اس اعلان کے بعد پریشان نظر آرہے ہیں۔
بھارت میں حالیہ مہینوں میں ٹیلی ویژن چینلز، آن لائن اسٹریمنگ سروسز اور سوشل میڈیا پر کوائن ڈی سی ایکس، کوائن سوئچ کوبر سمیت دیگر گھریلو کرپٹو ایکسچینجز کے اشتہارات بھارتی میڈیا پر بہت زیادہ زیر گردش ہیں۔
ان پلیٹ فارمز نے حال ہی میں ختم ہونے والے ٹی 20 ورلڈ کپ کے دوران اشتہارات کی مد میں 50 کروڑ بھارتی روپے سے زیادہ خرچ کیے اور اوسطاً ایک میچ پر کرپٹو کرنسی کے 51 اشتہارات نشر کیے گئے۔
