راولپنڈی: بے نظیر بھٹو اسپتال سے اغوا ہونے والے شیر خوار بچے کو پولیس نے چوبیس گھنٹوں کے اندر بازیاب کر لیا۔
تفصیلات کے مطابق راولپنڈی پولیس نے 3 ماہ کا بچہ محمد موسیٰ بازیاب کر کے روبینہ نامی خاتون کو گرفتار کر لیا، خاتون نے بچے کو گزشتہ روز بے نظیر بھٹو اسپتال سے اغوا کیا تھا۔
پولیس نے وومن تھانے میں بچہ والدین کے حوالے کر دیا، ذرائع نے بتایا کہ بچے کو شکایت ملنے کے بعد قانون نافذ کرنے والے حساس اداروں کی مدد سے چوبیس گھنٹوں کے اندر اندر بازیاب کیا۔
بچے محمد موسیٰ کے اغوا میں ملوث روبینہ نامی اغوا کار خاتون کراچی میں بھی بچوں کے اغوا کی متعدد وارداتیں کر چکی ہے، سی پی او شہزاد ندیم بخاری نے میڈیا کو بتایا کہ روبینہ بچوں کے اغوا کے مقدمے میں جیل بھی کاٹ چکی ہے۔
انھوں نے بتایا کہ ملزمہ کراچی سے جیل کاٹ کر راولپنڈی پہنچی اور یہاں بھی واردات کر لی، بچے کی بازیابی کے لیے پولیس نے دن رات ایک کیا، ملزمہ کی گرفتاری اور بچے کی بازیابی پر دلی سکون ملا ہے۔
