دادو : نوبل انعام یافتہ ملالہ یوسف زئی کھیرموری میں سیلاب متاثرین سے گھل مل گئیں اور کہا میں سیلاب متاثرین کی ہر ممکن مدد کرنی کی کوشش کروں گی۔
تفصیلات کے مطابق نوبل انعام یافتہ ملالہ یوسف زئی دادو کے سیلاب متاثرہ علاقے کھیر موری پہنچیں ، وزیر صحت سندھ عذرا پیچوہو اور وزیر تعلیم سندھ سردار شاه بھی ملالہ یوسف زئی کے ہمراہ تھے۔
دورے کے دوران ملالہ یوسف زئی نے کھیر موری میں سیلاب متاثرین کے مختلف ٹینٹ اسکول اور میڈیکل کیمپ اور سیلاب متاثرین کے کیمپوں کا دورہ کیا۔
ملالہ یوسف زئی سیلاب متاثرین سے گھل مل گئیں، اس موقع پر ملالہ یوسف زئی نے سیلاب متاثرین سے بات کرتے ہوئے کہا کہ سیلاب سے بڑی تعداد میں تباہی ہوئی ہے، سب سے زیادہ خواتین اور بچے سیلاب سے متاثر ہوئے ہیں۔
ان کا مزید کہنا تھا کہ اس سیلاب نے حاملہ خواتین کو بھی شدید متاثر کیا ہے۔
ملالہ یوسف زئی نے کہا کہ سیلاب سے سندھ کو صحت کا بڑا مسئلہ درپیش ہے اور بڑی تعداد میں بچوں کی تعلیم بھی متاثر ہوئی ہے۔
انھوں نے اس عزم کا اظہار کیا کہ میں سیلاب متاثرین کی ہر ممکن مدد کرنی کی کوشش کروں گی۔
دورے سے واپسی پر ملالہ یوسف زئی اور ان کے والد کو شال اور اجرک پیش کی گئی ، ملالہ نے اپنے دورے پر سندھ حکومت کے تعاون کا شکریہ ادا کیا۔
دوسری جانب وزیراعلیٰ سندھ سید مراد علی شاہ نے ملالا یوسف زئی کے سیلاب زدہ دورے کو سراہتے ہوئے کہا کہ ملالہ کے دورے سے سندھ میں انسانی کرائسز کی آواز عالمی سطح تک پہنچے گی۔
ملالہ یوسف زئی اور ضیاء الدین یوسف زئی کا سیلاب زدہ علاقوں کے دورے کا مقصد متاثرین کی مدد کرنا ہے۔
