لاہور: پی ٹی آئی کارکن ظل شاہ کی موت ٹریفک حادثہ قرار دے کر دوسرامقدمہ درج کرلیا گیا، علی بلال کو اسپتال منتقل کرنے والے ملزمان کے بیان پر مقدمہ درج کیا۔
تفصیلات کے مطابق پولیس نے پی ٹی آئی کارکن علی بلال عرف ظل شاہ کی موت ٹریفک حادثہ قرار دیتے ہوئے دوسرا مقدمہ درج کرلیا۔
پولیس نے بتایا کہ مقدمہ تھانہ سرورروڈ میں درج کیا گیا، پہلے کیس کے تفتیشی افسر مدعی بنے، علی بلال کواسپتال منتقل کرنے والے ملزمان کے بیان پر مقدمہ درج کیا۔
ایف آئی آر میں کہا گیا کہ بیچ سڑک چلتے علی بلال کو تیز رفتار ویگو ڈالے نے ٹکرماری، زخمی حالت میں علی بلال کو سروسز اسپتال منتقل کیا لیکن وہ دم توڑگیا۔
ملزمان نے تفتیشی افسر کو بیان میں کہا کہ موت کی اطلاع ملتے ہی اسپتال سے فرار ہوگئے۔
ایف آئی آر کے متن میں کہا گیا کہ ویگو ڈالہ نجی کمپنی کے زیراستعمال تھا، انتظامیہ نے حادثے کا عمران خان کو بتایا، کمپنی ڈائریکٹر راجا شکیل نے یاسمین راشد کے ساتھ زمان پارک جا کر اطلاع دی۔
