اسلام آباد: سابق صدر آصف علی زرداری نے اہم مشاورتی اجلاس طلب کر لیا۔
پیپلز پارٹی ذرائع کے مطابق سابق صدر آصف علی زرداری نے آج شام 4 بجے زرداری ہاؤس اسلام آباد میں اہم مشاورتی اجلاس طلب کیا ہے جس میں پیپلزپارٹی کی سینئر قیادت شریک ہونگے۔
ذرائع کا بتانا ہے کہ چیئرمین پیپلزپارٹی بلاول بھٹو کی مشاورتی اجلاس میں شرکت کا امکان ہے اس کے علاوہ نیئربخاری، فرحت اللہ بابر، شیری رحمان قمرزمان کائرہ، فیصل کریم کنڈی سمیت دیگر رہنماشریک ہوں گے۔
ذرائع کا کہنا ہے کہ اسپیکر قومی اسمبلی راجہ پرویز اشرف کی بھی اجلاس میں شرکت کا امکان ہے، اجلام میں پی پی قیادت سپریم کورٹ فیصلے سے متعلق پارٹی سے مشاورت کرے گی، ساتھ ہی انتخابات سے متعلق بھی اہم مشاورت ہوگی۔
ذرائع نے بتایا کہ پی پی قیادت اتحادیوں کے اجلاس سے متعلق پارٹی کو اعتماد میں لے گی، مشاورتی اجلاس میں سی ای سی، کور کمیٹی میٹنگ بلانے پر غور ہوگا اور آئندہ کا لائحہ عمل ترتیب دیا جائے گا۔
