اسلام آباد: قومی کھیل ہاکی کے مستقبل کے تعین کے لیے وزیراعظم کی کمیٹی کی جانب سے سفارشات تیار کر لی گئیں، خصوصی کمیٹی نے موجودہ سیٹ اپ کو تبدیل کرنے کی سفارش کردی۔
اے آر وائی نیوز کے مطابق پاکستان کا قومی کھیل ہاکی جو کہ زبوں حالی کا شکار ہے، اس کے مستقبل کے تعین کے سلسلے میں وزیراعظم کی کمیٹی کی جانب سے سفارشات تیار کر لی گئی ہیں، خصوصی کمیٹی نے پاکستان ہاکی فیڈریشن کے موجودہ سیٹ اپ کو تبدیل کرنے کی سفارش کی ہے۔
ذرائع کا اس حوالے سے کہنا ہے کہ ہاکی فیڈریشن کے معاملات کو چلانے کے لیے عبوری سیٹ اپ تشکیل دیا جائے گا۔
وزیر دفاع خواجہ آصف خصوصی کمیٹی کے سربراہ ہیں، کمیٹی کی جانب سے اولمپئنز پر مشتمل کمیٹی کی سفارشات کی بھی توثیق کر دی ہے۔
واضح رہے کہ پی ایچ ایف کے پیٹرن انچیف وزیراعظم پاکستان نے خصوص کمیٹی کو فیصلے کا اختیار دے رکھا ہے۔