کراچی: اسٹیٹ بینک کے گورنر جمیل احمد کا کہنا ہے کہ عالمی معیشت دباؤ کا شکار رہی جس کے باعث ملک میں مہنگائی میں اضافہ ہوا، اسٹیٹ بینک کی زری پالیسی کمیٹی اب ایک آزاد فورم ہے۔
اسٹیٹ بینک کے صدر دفتر، کراچی میں 76 ویں یوم آزادی کے موقع پر پرچم کشائی کی تقریب سے خطاب کرتے ہوئے اسٹیٹ بینک کے گورنر جمیل احمد نے بانی پاکستان قائد اعظم محمد علی جناح اور ان کے رْفقا کو زبردست خراج تحسین پیش کیا۔
تقریب کے آغاز میں گورنر جمیل احمد نے پرچم کشائی کی، جس کے بعد پاک بحریہ کے بینڈ نے قومی ترانے کی دھن کو پیش کیا، تقریب میں اسٹیٹ بینک کی سینئر انتظامیہ، افسران اور ان کے اہل خانہ بڑی تعداد میں شریک ہوئے۔
گورنر اسٹیٹ بینک نے کہا کہ بہترین بین الاقوامی روایات کی پیروی کرتے ہوئے، اسٹیٹ بینک کی زری پالیسی کمیٹی اب ایک آزاد فورم ہے، جو مہنگائی کے وسط مدتی اہداف اور ملک کے معاشی حالات کو مدنظر رکھتے ہوئے زری پالیسی کے بارے میں فیصلہ کرتی ہے۔
گورنر اسٹیٹ بینک نے گزشتہ سال 76 سال کے دوران مرکزی بینک کی غیر معمولی کامیابیوں کا ذکر کیا، جن میں سب سے اہم پاکستانیوں کا اعتماد حاصل کرنا تھا۔
اسٹیٹ بینک کے گورنر کا مزید کہنا تھا کہ اسٹیٹ بینک سالانہ اور ششماہی رپورٹوں کے ذریعے پارلیمنٹ کو اپنے اہداف اور سرگرمیوں سے بھی آگاہ رکھتا ہے۔
انہوں نے کہا کہ ماضی قریب میں عالمی معیشت دباؤ کا شکار رہی جس کے باعث ملک میں مہنگائی کا سیلاب آیا، سیلاب اور آئی ایم ایف پروگرام کے جائزے میں تاخیر کے باعث حالات ابتری کا شکار ہوئے۔
