پاکستان مسلم لیگ (ن) کے صدر میاں محمد شہباز شریف پاکستان نے 24 ویں وزیر اعظم منتخب ہوگئے ہیں جس کے بعد سیاستدانوں کی جانب سے مبارکباد دینے کا سلسلہ جاری ہے۔
تفصیلات کے مطابق سابق نگراں وزیر اعظم انوارالحق کاکڑ نے کہا کہ شہباز شریف کو پاکستان کا نیا وزیراعظم منتخب ہونے پر مبارکباد دیتا ہوں، اس اہم سفر پر آپ کے لیے نیک خواہشات کا اظہار کرتا ہوں، امید ہے آپ کا دور ہماری قوم کیلئے خوشحالی، ترقی اور اتحاد لائے۔
گورنر سندھ کامران خان ٹیسوری نے کہا کہ شہباز شریف کا انتخاب ملک میں جمہوری عمل کے کامیابی سے آگے بڑھنے کا ثبوت ہے، قوی امید ہے کہ آب کی قیادت میں ملک ترقی و خوشحالی کی نئی منازل طے کرے گا۔
استحکام پاکستان پارٹی کے صدر عبدالعلیم خان نے کہا کہ ملک میں جمہوری تسلسل خوش آئند ہے، مثبت روایات قائم ہوں گی، امید ہے وزیراعظم شہباز شریف ملک کو احسن انداز میں چلائیں گے۔
وزیراعلیٰ سندھ مراد علی شاہ نے بھی نومنتخب وزیراعظم شہبازشریف کو مبارکباد دی اور کہا کہ شہباز شریف کو201 ووٹ حاصل کر کے شاندار کامیابی مبارک ہو، شہباز شریف سینئر پارلیمینٹرین اورتجربہ کار سیاستدان ہیں۔
وزیر اعلیٰ سندھ مراد علی شاہ نے کہا کہ امید ہے شہباز شریف کے دور میں ملک ترقی کرے گا۔
