اس سال ہونے والے ٹی ٹوئنٹی ورلڈکپ سے قبل بھارتی کرکٹ ٹیم اپنے اہم ترین کھلاڑی کی خدمات سے محروم ہوگئی۔
فاسٹ بولر محمد شامی ان فٹ ہونے کے باعث 2023 ون ڈے ورلڈ کپ کے بعد سے ایکشن میں نظر نہیں آئے جبکہ حال ہی میں ان کی سرجری ہوئی ہے۔ بی سی سی آئی کے سیکریٹری جے شاہ نے محمد شامی کی مسابقتی کرکٹ میں واپسی کے حوالے سے ٹائم لائن بتائی ہے۔
جے شاہ نے بتایا کہ اس سال امریکا اور ویسٹ انڈیز میں کھیلے جانے والے ٹی ٹوئنٹی ورلڈ کپ میں بھارتی ٹیم کو سینئر فاسٹ بولر کی خدمات حاصل نہیں ہونگی
انھوں نے بتایا کہ پیسر کامیاب سرجری کے بعد بھارت واپس آچکے ہیں اور ممکنہ طور پر ستمبر میں بنگلہ دیش کے خلاف سیریز کے دوران وہ بین الاقوامی کرکٹ میں واپس آجائیں گے۔
ہندوستانی ٹیم اس سال ستمبر میں بنگلہ دیش کی دو ٹیسٹ اور تین ٹی ٹوئنٹی میچوں کی میزبانی کرے گی۔
واضح رہے کہ محمد شامی ون ڈے ورلڈ کپ میں سب سے زیادہ وکٹیں لینے والے بولر تھے جبکہ انجری کے ساتھ ہی انھوں نے میگا آئی سی سی ایونٹ بھی کھیلا تھا۔
ان کی گزشتہ ماہ پنڈلی کے پٹھے کی سرجری ہوئی تھی جبکہ انگلینڈ کے خلاف پانچ میچوں کی ٹیسٹ سیریز سے باہر ہو گئے تھے۔
