ٹیلی ویژن شو دیکھنے کے بعد خاتون نے بھیانک واردات کرتے ہوئے انسانیت کو شرمادیا، سیریل ‘کرائم پٹرول’ دیکھ کر انتہائی قدم اٹھایا۔
بھارتی ریاست بہار کے مظفر پور ضلع میں افسوسناک واقعہ پیش آیا جہاں ایک ماں نے اپنی معصوم بچی کو قتل کرکے لاش سوٹ کیس میں پھینک دی، پولیس نے بتایا کہ گرفتار خاتون نے سیریل ‘کرائم پٹرول’ دیکھ کر بچی کے قتل کا منصوبہ بنایا تھا۔
خاتون نے وقوع کے دن اپنے شوہر منوج کو فون کر کے بتایا تھا کہ وہ اپنی خالہ کے گھر جا رہی ہے، پولیس نے چھان بین کی تو عقدہ کھلا، فرانزک ٹیم کو فرش، سنک اور چھت پر خون کے نشانات ملے جبکہ لڑکی کی ماں کاجل لاپتہ تھی۔
متوفی کے والد نے مٹھن پورہ تھانے میں ایف آئی آر درج کرائی تھی، کیس کی حساسیت کو دیکھتے ہوئے سینئر سپرنٹنڈنٹ آف پولیس کی ہدایت پر ایک خصوصی تحقیقاتی ٹیم تشکیل دی گئی۔
پولیس ٹیم نے تکنیکی بنیادوں پر تحقیقات کو آگے بڑھایا تو سامنے آنے والے حقائق کی بنیاد پر لڑکی کی والدہ کو حراست میں لے کر پوچھ گچھ کی گئی اور سارا معاملہ بے نقاب ہو گیا۔
ملزمہ خاتون نے بتایا کہ اس نے اپنی بیٹی کو اکیلے قتل کیا ہے، وہ کرائم پیٹرول دیکھتی تھی اور اپنی بیٹی کو قتل کرنے اور اس کی لاش کو سوٹ کیس میں بھرنے کا خیال ٹی وی شو کی کچھ اقساط دیکھ کر آیا۔
سپرنٹنڈنٹ اودھیش سروج ڈکشٹ نے بتایا کہ ملزمہ دوسرے نوجوان کے ساتھ تعلقات میں تھی، نوجوان خاتون کو بچے کے ساتھ قبول کرنے کو تیار نہیں تھا۔
ان وجوہات کی بنا پر ملزم نے 23 اگست کو اپنی ہی بیٹی کا گلا چھری سے کاٹ کر قتل کر دیا۔ لاش کو سوٹ کیس میں باندھ کر گھر کے پیچھے چھت سے پھینک دیا گیا تاکہ شواہد کو مٹایا جا سکے، تاہم پولیس نے اسے پکڑ لیا۔
