مسٹر پرفیکشنسٹ کے طور پر جانے جانے والے بھارتی اداکار عامر خان اور ان کے بھائی فیصل خان کے درمیان تلخیاں ختم ہو گئی ہیں، دونوں اپنی والدہ کی سال گرہ پر گلے لگ گئے۔
بالی ووڈ اداکار عامر خان اور ان کے بھائی فیصل خان کافی عرصے بعد والدہ کی سالگرہ پر ملے، اس موقع پر دونوں نے ایک دوسرے کو گلے لگایا۔
یاد رہے کہ گزشتہ ہفتے عامر خان کی رہائش گاہ پر ان کی والدہ زینت حسین کی 89 ویں سال گرہ کی مختصر تقریب منعقد ہوئی تھی، جس میں عامر خان کی سابق اہلیہ کرن راؤ اور عامر کے بھائی فیصل خان نے بھی شرکت کی۔
دونوں بھائیوں نے ایک دوسرے کو گلے لگایا، جس کی تصاویر ان کی بہن نکہت ہیگڑے نے انسٹاگرام پر شیئر کیں، جو سوشل میڈیا پر وائرل ہو رہی ہیں۔
عامر اور فیصل کے تعلقات میں پچھلے برس اُس وقت کچھ تلخی آ گئی تھی، جب فیصل نے عامر کو ’موقع پرست‘ کہہ دیا تھا، دراصل عامر خان نے کئی برس پرانی اپنی ایک متنازع رائے پر میڈیا پر معافی مانگ لی تھی، جس پر فیصل نے کہا عامر کو فوراً ہی معذرت کرنا چاہیے تھی، اس وقت نہیں جب ان کی فلم ریلیز ہونے والی تھی، یہ بات موقع پرستی لگتی ہے۔
واضح رہے کہ ان دونوں بھائیوں نے 2000 کی فلم ’میلہ‘ میں ایک ساتھ اداکاری بھی کی تھی۔
