کراچی: تین روزہ ادب فیسٹول پاکستان کا آغاز ہوگیا، جس میں پاکستان سمیت دنیا بھر سے معروف ادبی و علمی شخصیات شرکت کریں گی.
تفصیلات کے مطابق گورنر ہاؤس میں اس فیسٹول کی افتتاحی تقریب منعقد ہوئی، جس سے گورنر سندھ نے خطاب کیا.
گورنر سندھ عمران اسماعیل نے کہا کہ گورنر ہاؤس میں اس فیسٹول کے انعقاد اور گورنر ہاؤس کو عوام کے لیے کھولنے کے پیچھے عمران خان کا وژن ہے، جو فنون لطفیہ کے فروغ کے لیے سرگرم ہیں.
انھوں نے میلے کی انتظامیہ کو بھرپور تعاون کی یقین دہانی کرواتے ہوئے کہا کہ جب تک وہ گورنر کے عہدے پر فائز ہیں، یہ فیسٹول اسی جگہ منعقد ہوتا رہے گا، اسے مستقبل میں عالمی سطح پر بھی لے جایا سکتا ہے.
گورنر سندھ نے کہا کہ پاکستان ایک ترقی کرتا ہوا ملک اور قوم ہے، جہاں ہر کوئی سرمایہ کاری کا خواہش مند ہے، اس کا سبب وزیر اعظم عمران خان کی شب و روز محنت ہے.
اس موقع پر اردو کی ممتاز ادبی شخصیت اور ادب فیسٹول پاکستان کے شریک بانی ڈاکٹر آصف فرخی نے اپنے خطاب میں اس میلے انعقاد، اس دوران پیش آنے والے مسائل اور مختلف طبقات کے تعاون کا ذکر کیا.
میلے کی شریک بانی امینہ سید نے گورنر سندھ، وزیر اعظم کے مشیر عشرت حسین، اپنے اسپانسرز، شرکا کا شکریہ ادا کیا اور امید ظاہر کیا کہ یہ فیسٹول نئی سمت کا تعین کرے گا.
