عدیم ہاشمی کی وجہِ شہرت شاعری اور ڈرامہ نگاری ہے۔ انھیں شعر و سخن کی دنیا میں اُن کے منفرد لب و لہجے نے مقبولیت دی اور ان کے تحریر کردہ ڈرامے بھی یادگار ثابت ہوئے۔
ممتاز شاعر، ادیب اور ڈرامہ نگار عدیم ہاشمی 5 نومبر 2001ء میں شکاگو میں انتقال کرگئے تھے۔ عدیم ہاشمی کا اصل نام فصیح الدّین تھا۔ ان کا تعلق متحدہ ہندوستان کے شہر ڈلہوزی سے تھا جہاں عدیم ہاشمی یکم اگست 1946ء کو پیدا ہوئے۔ عدیم ہاشمی کی زندگی کا ایک عرصہ فیصل آباد میں گزرا۔ 1970ء میں وہ لاہور آگئے تھے۔ یہاں ان کا کلام ادبی جریدوں میں باقاعدگی سے چھپنے لگا اور وہ ادبی حلقوں میں جگہ بنانے کے ساتھ قارئین میں مقبول ہونے لگے۔ اس دوران انھوں نے ریڈیو اور ٹی وی کے لیے گیت نگاری بھی کی۔
جدید اردو شعرا میں عدیم ہاشمی اپنے منفرد لب و لہجے کے سبب ممتاز ہوئے۔ ان کے متعدد شعری مجموعے شایع ہوئے جن میں ترکش، مکالمہ، فاصلے ایسے بھی ہوں گے، مجھے تم سے محبت ہے، چہرہ تمہارا یاد رہتا ہے، کہو کتنی محبت ہے سرفہرست ہیں۔
پاکستان میں ٹیلی وژن کے ناظرین میں عدیم ہاشمی نے ایک ڈرامہ نویس کے طور پر بھی پہچان بنائی۔ ’’آغوش‘‘ ان کا تحریر کردہ وہ ڈرامہ تھا جسے ملک بھر میں ناظرین نے دیکھا اور بہت پسند کیا۔ اپنے وقت کی اس کام یاب ڈرامہ سیریل کے علاوہ عدیم ہاشمی نے مزاحیہ ڈرامہ سیریز گیسٹ ہاؤس کی چند کہانیاں بھی تحریر کی تھیں۔
عدیم ہاشمی کی ایک غزل بہت مشہور ہے جسے غلام علی کی آواز میں آج بھی بڑے ذوق و شوق سے سنا جاتا ہے۔ ملاحظہ کیجیے۔
فاصلے ایسے بھی ہوں گے یہ کبھی سوچا نہ تھا
سامنے بیٹھا تھا میرے اور وہ میرا نہ تھا
وہ کہ خوشبو کی طرح پھیلا تھا میرے چار سُو
میں اسے محسوس کر سکتا تھا چھو سکتا نہ تھا
رات بھر پچھلی سی آہٹ کان میں آتی رہی
جھانک کر دیکھا گلی میں کوئی بھی آیا نہ تھا
میں تری صورت لیے سارے زمانے میں پھرا
ساری دنیا میں مگر کوئی ترے جیسا نہ تھا
آج ملنے کی خوشی میں صرف میں جاگا نہیں
تیری آنکھوں سے بھی لگتا ہے کہ تو سویا نہ تھا
یاد کر کے اور بھی تکلیف ہوتی تھی عدیمؔ
بھول جانے کے سوا اب کوئی بھی چارا نہ تھا
عدیم ہاشمی کو امریکا کے شہر شکاگو کے قبرستان میں سپردِ خاک کیا گیا۔
