کراچی: شہر قائد کے علاقے قائد آباد میں شاہ لطیف ٹاؤن پولیس کی مبینہ بھتہ خوری پر دکانداروں نے احتجاج کیا اور پولیس کے خلاف شدید نعرے بازی کرتے ہوئے ایک ٹریک بند کرادیا۔
اے آر وائی نیوز کی رپورٹ کے مطابق کراچی کے علاقے قائد آباد میں شاہ لطیف ٹاؤن تھانے کی پولیس کی مبینہ بھتہ خوری کے خلاف دکانداروں نے احتجاج کیا جس کے سبب قائد آباد شاہراہ پر ٹریفک کی آمدورفت معطل ہوگئی۔
مظاہرین کا کہنا تھا کہ پولیس نے دوپہر میں مرغی کا گوشت مانگا انکار پر دکانیں بند کرانا شروع کردیں۔
مظاہرین کے مطابق پولیس موبائل افسر نے ہوٹل اور دکانداروں سے پیسے مانگے انکار کرنے پر دکانداروں پر تشدد کے بعد 3 افراد کو گرفتار کرکے تھانے لے گئی۔
مظاہرین نے مطالبہ کیا کہ گرفتار بے گناہ افراد کو باعزت رہا کیا جائے۔
دوسری جانب پولیس حکام کا موقف ہے کہ قائد آباد میں پتھارے دار احتجاج کررہے ہیں، پولیس لاک ڈاؤن پالیسی کے تحت کاروبار بند کرانے گئی تھی۔
پولیس کے مطابق پتھارے داروں نے تین پولیس اہلکاروں پر تشدد کیا اور وردی پھاڑ دی، پولیس اہلکاروں پر تشدد، ہنگامہ آرائی میں ملوث 7 افراد کو گرفتار کیا گیا ہے۔
