بھارت میں کسانوں کا دہلی چلو مارچ 12 ویں روز بھی جاری ہے مشتعل کسانوں نے وزیراعظم مودی اور بی جے پی کے دیگر وزرا کے پُتلے جلا ڈالے۔
غیر ملکی میڈیا کے مطابق بھارت میں کسانوں کا اپنے حقوق کے حصول کے لیے مارچ 12 ویں روز بھی جاری ہے جب کہ ہریانہ پولیس مظاہرین پر بہیمانہ تشدد کر رہی ہے۔ ریاستی طاقت کے استعمال پر مشتعل مظاہرین نے وزیراعظم نریندر مودی اور بی جے پی کے دیگر وزرا کے پتلے نذر آتش کر دیے۔
ہریانہ پولیس نے شمبھو اور کھنوری میں پولیس کی رکاوٹوں کو توڑنے کی کوششوں کو ناکام بنانے کیلیے نہتے عوام پر آنسو گیس کے گولے برسائے۔
ہزاروں احتجاج کرنے والے کسانوں کو بھارتی سیکیورٹی فورسز کے تشدد کا سامنا کرنا پڑ رہا ہے جن کے تحفظ کے لیے نیزوں اور ڈھالوں سے لیس نہنگ سکھ جنگجو بھی احتجاج میں شامل ہو گئے ہیں۔
پنجاب سے باہر بھی کسان یونینز نے احتجاج کو وسیع کرنے کی کال دے دی ہے۔
