عراق کی پاپولر موبلائزیشن نے اربعین کے آخری ایام میں کربلا پہنچنے والے لاکھوں زائرین کی خدمت کے لیے صحت سے متعلق الرٹ رہنے کا اعلان کردیا ہے۔
بین الاقوامی خبر رساں ادارے کی رپورٹ کے مطابق الحشد الشعبی کے اطلاعاتی مرکز کے ایک بیان میں اعلان کیا گیا ہے کہ الحشد الشعبی کے مرکز برائے طبی امور کے نائب سربراہ ”ظفر فاضل” نے کربلا میں خصوصی ہیلتھ الرٹ آپریشن کے لئے متعلقہ محکموں کے منتظمین کے ساتھ ایک میٹنگ کا انعقاد کیا۔
میٹنگ میں بصرہ سے اربعین زیارت کے آغاز سے زائرین کو فراہم کی جانے والی طبی اور صحت کی خدمات اور دیگر متعلقہ ضروریات، مسائل اور چیلنجز پر تفصیلی بات چیت ہوئی۔
الحشد الشعبی میڈیکل اسٹاف کے نائب سربراہ نے اربعین کی مشی کے عروج کے دنوں میں داخل ہونے والے لاکھوں زائرین کو سامنے رکھتے ہوئے زائرین کے لئے خدمات کو دوگنا کرنے کا مطالبہ کیا اور فیلڈ ہسپتالوں اور ٹیموں کو زائرین کے گزرنے والی سڑکوں پر الرٹ رہنے کا حکم جاری کیا۔
انہوں نے زائرین کو زیادہ سے زیادہ خدمات فراہم کرنے کے لئے ان راستوں کے عملے کو بھی بھیجنے کی ہدایات جاری کیں جہاں سے اب مشی نہیں ہو رہی، تاکہ کربلا میں لاکھوں زائرین کے لئے صحت کی خدمات بہم پہنچائی جا سکیں اور کوئی بھی صحت کی سہولیات سے محروم نہ سکے۔
واضح رہے کہ کربلائے معلی میں ہر سال اربعین حسینی (چہلم امام عالی مقامؓ) کے موقع پر لاکھوں زائرین نذرانہ عقیدت پیش کرنے کے لئے پہنچتے ہیں۔
