اسلام آباد: اسپیشل جج سینٹرل اسلام آبادنے متنازع ٹویٹ کیس میں پی ٹی آئی رہنما اعظم سواتی کے قابل ضمانت وارنٹ گرفتاری جاری کردیے۔
تفصیلات کے مطابق اسپیشل جج سینٹرل اسلام آباد میں پی ٹی آئی رہنما اعظم سواتی کےخلاف متنازع ٹویٹ کے کیس کی سماعت ہوئی۔
اعظم سواتی کےوکیل سہیم خان اورپراسیکیوٹررضوان عباسی عدالت میں پیش ہوئے ، وکیل سہیل خان نے بتایا کہ پی ٹی آئی رہنماؤں کی عدالت کےباہرگرفتاریاں جاری ہیں، اعظم سواتی نے آج پیش ہوناتھا،اس وقت زمان پارک میں موجودہیں،کل شام 8 بجے کے بعد سے اعظم سواتی سے رابطہ نہیں ہوا۔
پراسیکیوٹررضوان عباسی نے سوال کیا کہ اعظم سواتی نےکیاعدالت سےحفاظتی ضمانت لی ہے؟ اعظم سواتی کو متعدد بار فرد جرم عائد کرنے کیلئےعدالت نے بلایا لیکن نہیں آئے۔
رضوان عباسی نے کہا کہ اعظم سواتی کی ویسےطبیعت ٹھیک ہےلیکن عدالت کےسامنےآنےپر طبیعت خراب ہوجاتی ہے، اعظم سواتی کی متعدد بارحاضری سےاستثناکی درخواستیں منظورکی گئیں۔
حلف نامےکےباوجود اعظم سواتی عدالت میں پیش نہیں ہوئے، ان کا زمان پارک میں رہائش پذیر ہونے کا ہی کوئی ثبوت دےدیں، عدالت سے استدعا ہے اعظم سواتی کےناقابل ضمانت وارنٹ گرفتاری جاری کیےجائیں۔
عدالت نے اعظم سواتی کی آج حاضری سےاستثناکی درخواست مسترد کرتے ہوئے قابل ضمانت وارنٹ گرفتاری جاری کردیے
عدالت نے اعظم سواتی کو 50 ہزار روپےکےضمانتی مچلکے جمع کروانے کاحکم دے دیا اور 30مئی کو فرد جرم عائد کرنے کیلئے طلب کرلیا۔
