کراچی : اے آر وائی ڈیجیٹل نیٹ ورک کے صدر اور سی ای او سلمان اقبال نے اے آر وائی نیوز کے دفتر پر حملے میں ملوث خواتین کو معاف کرنے کا اعلان کردیا۔
تفصیلات کے مطابق گزشتہ دنوں مدینہ سٹی مال صدر میں واقع اے آر وائی نیوز کے دفتر پر متحدہ قومی موومنٹ کے کارکنان کی جانب سے حملے کے دوران توڑ پھوڑ میں ملوث خواتین کو اے آر وائی ڈیجیٹل نیٹ ورک کے صدر اور سی ای او سلمان اقبال نے معاف کردیا ہے۔
سلمان اقبال نے کہا کہ وہ بھی کراچی کے رہنے والے ہیں، وہ ان خواتین کا اسی طرح عزت واحترام کرتے ہیں جس طرح وہ اس قوم کی دیگرماؤں، بہنوں اور بیٹیوں کا احترام کرتے ہیں، یہ خواتین بھی ویسی ہی مائیں بہنیں ہیں جیسے دیگرخواتین مائیں بہنیں ہیں۔
CEO ARY Network Salman Iqbal forgives MQM women… by arynews
انہوں نے کہا کہ وہ پاکستان خصوصاً کراچی کے عوام کی بہتری کے لیے ہمیشہ کوشاں رہتےہیں۔جو کچھ ہوا اچھا نہیں ہوا،حملے کا مقدمہ سرکار کی مدعیت میں درج ہوا ہے، اگر میرے بیان سے مقدمے پر کوئی اثر پرتا ہے تو میں ان تمام خواتین کو معاف کرنے کا اعلان کرتا ہوں۔
گزشتہ روز مذکورہ خواتین کی معاف کرنے کے لئے ایم کیو ایم کے مرکزی رہنما ڈاکٹر فاروق ستار اور خواجہ اظہار الحسن نے اے آر وائی کے سی ای او سلمان اقبال سے درخواست کی تھی۔
واضح رہے کہ ایم کیوایم کے کارکنان نے بائیس اگست کو اے آر وائی نیوز کراچی بیورو آفس پر حملہ کرکے توڑ پھوڑ مچائی اور عملے کو ہراساں کیا تھا۔ واقعے میں ملوث دیگر کے علاوہ خواتین کارکنان بھی زیرحراست ہیں۔
اے آر وائی نیوز کے دفتر پر حملے کے الزام میں تین خواتین رابعہ، قرۃ العین اور سمیرا کو گزشتہ روز انسداد دہشت گردی کی منتظم عدالت میں پیش کیا گیا تھا جہاں عدالت نے انہیں چار روزہ ریمانڈ پر پولیس کےحوالے کردیا تھا۔
اے آروائی نیوز پر حملے کی سی سی ٹی وی فوٹیج
