بہاولپور میں سی ٹی ڈی ٹیم پر فائرنگ کا واقعہ پیش آیا ہے، اس دوران دو گرفتار خطرناک دہشت گرد ہلاک ہوگئے۔
تفصیلات کے مطابق سی ٹی ڈی حکام کا کہنا ہے کہ سی ٹی ڈی کی ٹیم پر حملہ میں زیرحراست کالعدم ٹی ٹی پی کے دو دہشت گرد ہلاک ہوگئے، مذکورہ ٹیم زیرحراست دہشت گردوں کو اسلحہ ریکوری کیلئے لے جارہی تھی۔
حکام نے بتایا کہ زیرحراست دہشت گردوں کو چھڑانے کیلئے ان کے ساتھیوں نے حملہ کیا، حملے کےدوران زیرحراست 2دہشت گرد اپنے ہی ساتھیوں کی فائرنگ سے ہلاک ہوگئے۔
سی ٹی ڈی کے مطابق ہلاک دہشت گردوں میں عدیل عرف سیف اللہ خراسانی اور زین عرف اسداللہ خراسانی شامل ہیں، زیرحراست دہشت گردوں کا نیٹ ورک وفاقی وزیر کے قتل کی منصوبہ بندی کرچکا تھا۔
دونوں دہشت گردوں کو حاصل پورسے ایک قتل کی تفتیش کے دوران گرفتارکیا گیا تھا، دہشت گرد عدیل عرف سیف اللہ خراسانی نے چار رکنی گروہ بنا رکھا تھا۔
دہشت گردنیٹ ورک کے4کارندوں کو کچھ دن قبل ہی گرفتار کیا گیا، حملہ کرنے والے دہشت گردوں کی گرفتاری کے لیے کوششیں جاری ہیں۔
