کراچی: نگران وزیر اعلیٰ سندھ مقبول باقر نے کراچی میں مہنگائی کے خلاف جاری ہڑتال پر رد عمل دیا ہے۔
نگران وزیر اعلیٰ سندھ مقبول باقر نے کہا کہ نگران حکومتیں عوام کے مسائل سے بخوبی واقف ہیں، عوام مہنگائی کے باعث شدید پریشان ہیں، جس کا ہمیں احساس ہے۔
نگران وزیر اعلیٰ سندھ نے کہا کہ وفاق اور صوبائی حکومتیں ملکر عوام کو ریلیف دینے کیلئے اقدامات کررہی ہیں، احتجاج سب کا جمہوری حق ہے لیکن دوسروں کیلئے زحمت کا باعث نہیں بننا چاہیے۔
نگران وزیر اعلیٰ سندھ مقبول باقر نے مزید کہا کہ انتظامیہ احتجاج کو پرامن بنانے کیلئے تمام ضروری اقدامات کرے۔
واضح رہے کہ بدترین مہنگائی، بجلی کے بھاری بھر کم بل اور پیٹرول کی قیمتوں میں اضافے کے خلاف ملک بھر میں مظاہروں کا سلسلہ جاری ہے، جبکہ تاجر برادری کی جانب سے ملک بھر میں شٹر ڈاؤن ہڑتال کی جارہی ہے۔
معاشی حب کراچی میں کی سڑکوں پر ٹریفک معمول سے کم ہے، پبلک ٹرانسپورٹ غائب ہے، اورنگی ٹاؤن، شیرشاہ، داؤد چورنگی کے علاقوں میں شہری احتجاج کر رہے ہیں۔
