اسلام آباد: چیئرمین پی ٹی آئی عمران خان کو اداروں کو بغاوت پر اکسانے کے کیس میں حفاظتی ضمانت مل گئی ہے۔
سابق وزیراعظم عمران خان نے اداروں کو بغاوت پر اکسانے کے کیس میں ضمانت کے لیے اسلام آباد ہا ئیکورٹ سے رجوع کیا۔
عمران خان کی جانب سے دائر درخواست میں مؤقف اختیار کیا گیا ہے کہ شدید سکیورٹی تھریٹس ہیں جس وجہ سے دوبارہ قاتلانہ حملہ ہو سکتا ہے۔
درخواست میں عمران خان کے وکیل نے استدعا کی کہ عدالت ٹرائل کورٹ کی بجائے خود عبوری ضمانت منظور کرے اور ہائیکورٹ آج ہی ضمانت کی درخواست پر سماعت کرے۔
اسلام آباد ہائیکورٹ کے چیف جسٹس عامر فاروق نے درخواست پر سماعت کی، جس میں عمران خان کی جانب سے وکیل سلمان صفدر، فیصل چوہدری، علی بخاری و دیگر پیش ہوئے۔
سابق وزیر اعظم عمران خان بھی ضمانت کے لئے اسلام آباد ہائی کورٹ پیش ہوئے تاہم اسلام آباد ہائیکورٹ نے ایک لاکھ روپے کے مچلکوں کے عوض عمران خان کی ضمانت 3 مئی تک منظور کرلی ہے۔
عمران خان ہائیکورٹ سے روانہ
چیئرمین پی ٹی آئی عمران خان ہائیکورٹ میں پیشی کے بعد روانہ ہو گئے ہیں، عمران خان کی پیشی کے موقع پر اسلام آباد ہائیکورٹ میں سکیورٹی کے سخت انتظامات کیےگئے تھے۔
عمران خان کی آمد سے قبل کمرہ عدالت خالی کرا یا گیا اور کمرہ عدالت کو بم ڈسپوزل اسکواڈ نےکلیئر کیا جب کہ ڈرون کیمروں کے ذریعے بھی ہائیکورٹ کی سکیورٹی مانیٹرنگ کی گئی۔
اس سے قبل جب عمران خان اسلام آباد ہائیکورٹ پہنچے تو ان کی گاڑی کو گیٹ پر روک لیا گیا تھا، پولیس نے مؤقف اختیار کیا کہ عدالت نے گاڑی کے داخلے سے متعلق آگاہ نہیں کیا، ہائیکورٹ سےگاڑی کو داخلےکی اجازت ملی تو اندر جانے دینگے، عمران خان نےگاڑی ہائیکورٹ کے احاطے میں داخلے کیلئے درخواست دائر کردی۔
تاہم پاکستان تحریک انصاف کے چیئرمین اور سابق وزیر اعظم عمران خان پیدل اسلام آباد ہائیکورٹ کے احاطے میں داخل ہوئے۔
