کراچی اور حیدرآباد ڈویژن میں گزشتہ روز ہونے والے بلدیاتی انتخابات کے نتائج میں تاخیر پر الیکشن کمشنر سندھ کی جانب سے بیان جاری کیا گیا ہے۔
اے آر وائی نیوز کے مطابق سندھ میں بلدیاتی انتخابات کے دوسرے مرحلے میں گزشتہ روز کراچی اور حیدرآباد ڈویژن کے 16 اضلاع میں ہونے والے الیکشن کے نتائج غیر معمولی تاخیر کا شکار ہیں۔
آج صبح تک کراچی کی 246 یوسیز میں سے صرف 20 یوسیز کے مکمل غیر سرکاری اور غیر حتمی نتائج کا اعلان کیا گیا ہے جب کہ حیدرآباد کی بھی 32 یونین کونسلوں سمیت اندرون سندھ کے اضلاع میں بھی کئی یوسیز میں تاحال نتائج کا اعلان نہیں ہوسکا ہے۔
اس صورتحال پر صوبائی الیکشن کمشنر سندھ اعجاز انور چوہان کا کہنا ہے کہ تمام پولنگ اسٹیشنز سے نتائج آر اوز کے دفتر پہنچ رہے ہیں۔ یہ پیچیدہ عمل ہوتا ہے، ایک یوسی کا رزلٹ بنانے میں وقت لگتا ہے۔
الیکشن کمشنر سندھ نے مزید کہا کہ ہر یوسی کے 4 وارڈز ہیں اوراوسط 20 پولنگ اسٹیشن ہیں۔ ایک بھی پولنگ اسٹیشن کا نتیجہ نہ آئے تو یوسی کا نتیجہ مکمل نہیں ہوتا۔
ان کا کہنا تھا کہ ہر ریٹرننگ افسر کے پاس تقریباً 5 یوسیز ہیں۔ اسی لیے نتائج میں وقت لگ رہا ہے۔ ان انتخابات میں آر ٹی ایس سسٹم نہیں ہے بلکہ کمپیوٹر پر نتیجہ مرتب کیا جا رہا ہے۔
