راولپنڈی : خصوصی عدالت نے سائفر کیس میں چیئرمین پی ٹی آئی اور شاہ محمود قریشی پر فرد جرم کی کارروائی مؤخرکرتے ہوئے 23 اکتوبر کی تاریخ مقرر کردی۔
تفصیلات کے مطابق آفیشل سیکریٹ ایکٹ کے تحت خصوصی عدالت میں سائفرکیس کی اڈیالہ جیل میں سماعت ہوئی ، خصوصی عدالت کے جج ابو الحسنات ذوالقرنین نے کیس کی سماعت کی۔
چیئرمین پی ٹی آئی اور شاہ محمود قریشی کو کمرہ عدالت میں پیش کیا گیا ، سینئر پراسیکیوٹر شاہ خاور کمرہ عدالت میں موجود تھے۔
سائفر کیس کے ملزمان چیئرمین پی ٹی آئی اور شاہ محمود قریشی کو چالان کی نقول تقسیم کی گئی ، جس کے بعد خصوصی عدالت کی جانب سے ملزمان پر فرد جرم عائد ہونے کی کارروائی موخر کردی اور آئندہ سماعت ملزمان پر فرد جرم عائد کرنے کیلئے مقرر کردی۔
بعد ازاں آفیشل سیکریٹ ایکٹ سائفر کیس کی سماعت 23 اکتوبر تک ملتوی کردی گئی اور خصوصی عدالت کے جج ابوالحسنات سماعت کے بعد اڈیالہ جیل سے روانہ ہوگئے۔
ایف آئی اے اسپیشل پراسیکیوٹر شاہ خاور نے اڈیالہ جیل کے باہر میڈیا سے گفتگو کرتے ہوئے کہا کہ ملزمان کے وکلانے اعتراض اٹھایا تھاکہ چالان نقول نہیں دی گئی، عدالت نےملزمان کے وکلاکی درخواست پرسماعت23اکتوبر تک ملتوی کی، 23 اکتوبر کو فرد جرم کی کارروائی کی سماعت ہوگی۔
ان کا کہنا تھا کہ 23اکتوبر کو چارج فریم ہوگا اور فرد جرم عائد ہوگی اور فرد جرم عائد ہونے کے بعد سائفر کیس کا باقائدہ ٹرائل شروع ہوگا۔
