راولپنڈی: آرمی چیف جنرل قمر جاوید باجوہ کا کہنا ہے کہ افسر اور جوان خطرات کے پیش نظر پیشہ ورانہ مہارتوں پر توجہ رکھیں۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے لاہور کور کے فیلڈ ایریا کا دورہ کیا، اس موقع پر کور کمانڈر لاہور لیفٹیننٹ جنرل محمد عبدالعزیز بھی ان کے ہمراہ تھے۔
آرمی چیف کو فارمیشن کی آپریشنل تیاریوں پر بریفنگ دی گئی، جنرل قمر جاوید باجوہ نے جوانوں سے ملاقات کی اور چھوٹے ہتھیاروں سے فائرنگ کا مشاہدہ کیا۔
آئی ایس پی آر کے مطابق آرمی چیف نے جوانوں کی پیشہ ورانہ صلاحیتوں، تربیت کے اعلیٰ معیار کو سراہا۔
مزید پڑھیں: آرمی چیف کا شمالی اور جنوبی وزیرستان کا دورہ
آرمی چیف کا کہنا تھا کہ افسر اور جوان خطرات کے پیش نظر پیشہ ورانہ مہارتوں پر توجہ رکھیں، اعلیٰ مہارت اور تربیت ہر چیلنج کے موثر جواب میں اہم کردار ادا کرتی ہے۔
واضح رہے کہ گزشتہ دنوں آرمی چیف جنرل قمر جاوید باجوہ نے شمالی اور جنوبی وزیرستان کا دورہ کیا تھا، اس موقع پر آرمی چیف کو بارڈر مینجمنٹ، سماجی، اقتصادی ترقی کے منصوبوں پر بریفنگ دی گئی تھی۔
آرمی چیف کا کہنا تھا کہ پاکستان خطے میں امن و استحکام کے لیے کوشاں ہے، پاکستان نے بارڈر سیکیورٹی کو مزید موثر، فعال بنایا ہے، ایف سی اور قانون نافذ کرنے والے اداروں کی استعداد کار بہتر بنائی ہے۔
