کراچی: شہر قائد کے علاقے کورنگی صنعتی ایریا میں نجی سیکیورٹی کمپنی کا ڈرائیور کیش وین کا صفایا کر گیا، فرار ہونے کی ویڈیو سامنے آ گئی ہے۔
تفصیلات کے مطابق کورنگی صنعتی ایریا میں رقم لے جانے والی گاڑی کو ڈرائیور لے اڑا، گاڑی میں 6 کروڑ روپے سے زائد کی رقم موجود تھی، جسے بعد ازاں ملزم ڈرائیور نے راستے میں چھوڑ دیا۔
پولیس حکام کا کہنا ہے کہ ملزم ڈرائیور گارڈز کو چھوڑ کر اچانک کیش وین لے کر فرار ہوا، نجی کمپنی کی کیش وین کچھ دیر بعد کورنگی عوامی کالونی کے علاقے سے ہی مل گئی، جب کہ ڈرائیور کیش لے کر ساتھیوں کے ہمراہ پہلے سے انتظار میں کھڑی کار میں بیٹھ کر فرار ہوا۔
پولیس نے کیش وین کو تحویل میں لے کر مقدمہ درج کر لیا ہے، واقعے کی مزید جانچ پڑتال بھی کی جا رہی ہے، پولیس نے کیش لے کر فرار ہونے والے ملزم کا ڈیٹا بھی حاصل کر لیا ہے، ملزم کا تعلق پنجاب کے ضلع وہاڑی سے بتایا جاتا ہے۔
دریں اثنا، ملزم کی ساتھیوں کے ہمراہ فرار ہونے کی سی سی ٹی وی فوٹیج منظر عام پرآ گئی ہے، نجی کمپنی کا ڈرائیور بلیک کرولا کار میں ساتھیوں کے ہمراہ فرار ہوا تھا، فوٹیج میں ملزم کو کیش وین کو روڈ پر چھوڑ کر فرار ہوتے ہوئے دیکھا جا سکتا ہے۔
