بھارت میں 13 سال کی بچی نے اپنی جان پر کھیل کر اپنی والدہ کو موت کے منہ میں جانے سے بچا لیا، خونخوار مگرمچھ کا تنہا مقابلہ کرکے سب کو حیران کردیا۔
بھارتی شہر علی گڑھ شہر کے احمد پورہ علاقے کی رہنے والی 13 سالہ گڑیا نامی بچی کا حوصلہ اس کی عمر سے کئی گنا زیادہ نکلا، اس نے ایسا کام کردیا کہ گھر والے اسے فخریہ نگاہوں سے دیکھ رہے ہیں۔
گزشتہ روز گڑیا کی ماں ستیہ وتی کالی ندی کے کنارے چارہ لینے گئی تھی اسی دوران ایک مگرمچھ نے اس پر حملہ کردیا اور اسے گھسیٹ کر ندی میں لے گیا، ماں کی چیخیں سن کر گڑیا نے اپنی جان کی پروا کیے بغیر دریا میں چھلانگ لگا دی۔
وہ درانتی سے مگرمچھ پر مسلسل حملہ کرتی رہی بیٹی کی بہادری دیکھ کر ماں نے بھی ہمت دکھائی۔ مگرمچھ کے جبڑے میں ایک ہاتھ پھنس جانے کے باوجود ستیہ وتی نے دوسرے ہاتھ سے مگرمچھ پر حملہ کرنا شروع کر دیا، گڑیا مگرمچھ پر درانتی سے اس وقت تک حملہ کرتی رہی جب تک مگرمچھ نے اس کی ماں کو چھوڑ نہیں دیا، جس کے بعد اس کی ماں مگرمچھ کے شکنجے سے آزاد ہوگئی۔
واقعے کے بعد سے ستیہ وتی کی حالت تشویشناک ہے۔ ستیہ وتی کا علاج سرکاری ہسپتال میں کرایا گیا۔ ستیہ وتی اب گھر آگئی ہے۔ جس انداز میں بہادر بیٹی نے اپنی ماں کی جان بچائی۔ پورے شہر وہ موضوع بحث ہے۔
