کنگ خان کی ’ڈنکی‘ نے اوورسیز مارکیٹ میں کامیابی کے جھنڈے گاڑ دیے، فلم اداکار کی سپر ہٹ فلم ’چنائی ایکسپریس‘ سے بھی آگے نکل گئی۔
شاہ رخ خان کی حالیہ ریلیز ہونے والی فلم ’ڈنکی‘ ان کی تیسری سب سے زیادہ کمائی کرنے والی فلم بن گئی۔ مووی نے عالمی باکس آفس پر 422 کروڑ بھارتی روپے سے زیادہ کا بزنس کرتے ہوئے ان ہی کی فلم ’چنائی ایکسپریس‘ کو پیچھے چھوڑ دیا۔
فلم نے صرف 15 دنوں میں یہ سنگ میل حاصل کیا ہے۔ ’ڈنکی‘ اب تک بھارت میں 208 کروڑ روپے کے قریب بزنس کرچکی ہے جبکہ ہفتے اور اتورا کو اس کی کمائی می مزید اضافے کی توقع ہے۔
اوورسیز مارکیٹ میں بھی شاہ رخ کا جادو خوب چلا اور یہاں بھی بالی وڈ اداکار کی فلم نے اب تک 176 کروڑ روپے سمیٹ لیے ہیں۔
ڈنکی میں باہر جانے کے خواہشمند افراد کی جدوجہد کو دکھایا گیا ہے۔ فلم میں شاہ رخ کے ساتھ ساؤتھ کی اداکارہ تاپسی پنوں، وکی کوشل اور بومن ایرانی نے مرکزی کردار ادا کیے ہیں۔
واضح رہے کہ شاہ رخ خان کے لیے گزشتہ سال 2023 بہت متاثر کن اور کامیاب رہا، اس سال انھوں نے بالی وڈ کو تین بلاک بسٹر فلمیں دیں۔
بالی وڈ کنگ شاہ رخ خان واحد بھارتی اداکار بھی بن گئے جن کی فلموں نے ایک سال میں مجموعی طور پر 2500 کروڑ سے زائد کا بزنس کیا ہے۔
