اسلام آباد : ملک بھر میں عام انتخابات نئی حلقہ بندیوں پر ہوں گے یا پرانی پر، اس حوالے سے الیکشن کمیشن حکام نے روزانہ کی بنیاد سر جوڑ لیے، چند روز میں اہم فیصلے کا امکان ہے۔
تفصیلات کے مطابق چیف الیکشن کمشنر کی زیرصدارت نئی مردم شماری اور حلقہ بندیوں سے متعلق اجلاس منعقد ہوا جس میں چاروں ممبران کمیشن، سیکرٹری اور قانونی ٹیم نے شرکت کی۔
اجلاس میں نئی مردم شماری کے بعد حلقہ بندیوں پر قانونی ٹیم نے شرکاء کو بریفنگ دی، قانونی ٹیم نے آرٹیکل 51اور الیکشن ایکٹ کی شق 17سے متعلق وضاحت دی۔
اس حوالے سے الیکشن کمیشن کے ذرائع کا کہنا ہے کہ قانونی ٹیم نے حکام کو نئی حلقہ بندیاں کرنے کی تجویز دے دی ہے۔
ذرائع الیکشن کمیشن کے مطابق نئی مردم شماری کے بعد الیکشن کیلئے حلقہ بندیاں ناگزیر ہیں، الیکشن کمیشن کا آئندہ ایک دو روز میں نئی حلقہ بندیوں کا اعلان کیے جانے کا امکان ہے۔
